Дар арафаи 20-солагии Рӯзи Ваҳдати миллӣ ва “Соли ҷавонон” бо сарбозон ва афсарони қисми ҳарбии 0336-и Раёсати Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар шаҳри Қӯрғонтеппа вохӯрии мудири Бахши кор бо ҷавонон ва варзиши шаҳри Қӯрғонтеппа Ҷамолиддин Исматуллозода ва сармуҳаррири рӯзномаи шаҳрии “Набзи Қӯрғонтеппа”, шоир Усмон Билолӣ бо ҳайати шахсии раёсат ва хизматчиёни ҳарбӣ баргузор гардид.

Дар вохӯрӣ Ҷамолиддин Исматуллозода сарбозон ва афсаронро бахшида ба Рӯзи Ваҳдати миллӣ ва “Соли ҷавонон” табрик намуда иброз дошт, ки дастовардҳои даврони соҳибистиқлолии кишвар ҳамчун нишона аз тинҷиву оромӣ ва ваҳдати миллӣ, ҷавононро ба ватандӯстию хештаншиносӣ, пос доштани муқаддасоти кишвар ва ҳифзи марзу буми меҳан даъват менамояд.

Усмон Билолӣ дар суҳбати хосса бо сарбозон оид ба аҳамияти Ваҳдати миллӣ, сулҳ ва ҳамдигарфаҳмӣ ҳарф зада, ин омилро дар пешрафти ҳаматарафаи Тоҷикистон арзишманд арзёбӣ кард.

Дар фарҷоми вохӯрӣ 10 нафар афсарон ва сарбозон барои хизмати содиқона ба Ватан бо сипосномаҳои Бахши кор бо ҷавонон ва варзиши шаҳр қадрдонӣ шуда, аз тарафи Маркази фарҳангии ҷавонони шаҳр барномаи ҷолиби фарҳангӣ барои болидахотирии афсарону сарбозон намоиш дода шуд.

Умед Мирзоев, “ҶТ”