Бахшида ба 21-умин солгарди Ваҳдати миллӣ бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон, 26 июн, дар толори Муассисаи давлатии “Наврӯзгоҳ”-и пойтахт конференсияи илмӣ-назариявӣ дар мавзӯи “Нақши ҷавонон дар таҳкими ватандӯстӣ ва пойдории Ваҳдати миллӣ” бо иштироки ҷавонони фаъоли тамоми идораву корхонаҳои дахлдор баргузор гардид.

Аҳмадзода Дилноза, муовини раиси Кумитаи кор бо ҷавонон ва варзиш, зимни ифтитоҳи конференсия ҳозиринро ба иди фархундаи Ваҳдати миллӣ шодбош намуда, иброз дошт, “Ваҳдати миллӣ ҳамчун омили муттаҳидсозандаи кулли мардуми шарафманди Тоҷикистон шароити мусоид фароҳам овард, ки бо истифодаи арзишҳои аз ҷониби ҷомеаи ҷаҳонӣ эътирофшуда, дар мамлакатамон таҳкурсии ташаккули ҷомеаи шаҳрвандӣ гузошта шавад ва барои андаке бошад ҳам, барои беҳтар гардидани сатҳи зиндагии мардум, ободӣ ва ояндаи давлати соҳибистиқлоламон заминаи мусоид муҳайё гардад”.

Гуфта шуд, ки Ваҳдати миллӣ барои кулли сокинони кишвар, бахусус ҷавонони саодатманди диёр асоси ифтихороти ватандорӣ буда, кору пайкор ва ҳар иқдому нияти неки ҷавонон ба хотири таҳкими он мебошад.

Дар фарҷоми конференсия маърузачиёни беҳтарин бо туҳфаҳои хотиравӣ қадрдонӣ шуданд.