Ваҳдат беҳтарин неъмат барои тамоми инсоният буда, он тамоми некию хубиҳои дунёро дар худ таҷассум намудааст. Зеро танҳо бо будани ваҳдат душворию монеаҳо паси сар мешаванд, рӯзгори мардум рӯ ба беҳбудӣ мениҳад ва халқ орому осуда зиндагӣ менамояд.

Дар воқеъ, Ваҳдати миллӣ шукуфоии Ватан аст, ки имрӯзҳо мардуми озоди кишвар меҳнати софдилонаи худро давом дода, ҳаёти хушбахтона гузаронида истодаанд. Аз ҷумла, мо – омӯзгорони ҷавонон, насли хушбахттарини ҷаҳонем, ки дар замони сулҳу осоиштагӣ зиндагӣ менамоем ва аз ин иқболи баланди худ меболем.

Ҷанги шаҳрвандӣ ҷанге буд, ки дар паи он бадтарин рӯзҳо ба сарамон омад! Хушбахтона, бо дастгириву пешниҳод, ҷаҳду талош, ҷонбозиву талошҳои фарзанди фарзонаи миллат, Сарвари мушфиқу ғамхор, Асосгузори сулҳу Ваҳдати миллӣ – Пешвои миллат, муҳтарам Эмомалӣ Раҳмон мо ба сулҳу ваҳдат расидем.

Имрӯз кишвари азизи моро беш аз 170 мамлакати ҷаҳон бо пойдор гардидани сулҳу имзо гардидани Созишномаи истиқрори сулҳ, ки аз он 20 сол пур мешавад, мешиносанд.

Ҷашн гирифтани 20-солагии Ваҳдати миллӣ дар соли 2017 ба “Соли ҷавонон” рост омад. Аз ин рӯ, ба ҷавонон ин як имтиҳони бузург аст, ки онҳо чун қишри ояндасози ҷомеа баҳри пойдории сулҳу субот ва оромиву осудагии кишвари азиз бетараф набошанд.

Бинобар ин, мо ҳамчун устодони даврони истиқлол, фарзандонро дар руҳияи садоқатмандӣ, ватандӯстӣ, меҳанпарастӣ, хештаншиносӣ ва худогоҳии миллӣ тарбия менамоем. Бигзор, ба бахти онҳо сулҳ пойдор бошаду осмон ҳамеша софу беғубор бимонад.

Тӯтинисо ӮРУНОВА, омӯзгори МТМУ №15, ноҳияи Б.Ғафуров