Ба хотири муттаҳидсозӣ, таҳкими рукнҳои дӯстию рафоқат ва рушди фарҳангии ҷавонон 18 июни соли ҷорӣ бо ташаббуси Кумитаи кор бо ҷавонон ва варзиши назди Ҳукумати ҷумҳурӣ дар ҳамбастагӣ бо мақомоти иҷроияи маҳаллии ҳокимияти давлатии шаҳри Ваҳдат, бахшида ба 20-солагии Рӯзи Ваҳдати миллӣ ва “Соли ҷавонон” дар шаҳри Ваҳдат бо иштироки 100 нафар ҷавонони фаъол аз ҳамаи минтақаҳои ҷумҳурӣ, Фестивали ҷумҳуриявии дӯстии ҷавонон доир гардид.

Масъулини шаҳри Ваҳдат гурӯҳи ҷавонони меҳмонро дар назди майдони “Ғалаба” бо шукӯҳу шаҳомати хосса пешвоз гирифта, дар назди меҳмонон дар бораи сулҳу ваҳдат шеърҳо қироат намуданд.

Сипас аз назди майдони “Ғалаба” то назди Қасри фарҳанги шаҳр бо иштироки зиёда аз 3000 нафар ҷавон таҳти унвони “Ҷавонон - посдори Ваҳдат” роҳпаймоӣ баргузор гардид.

Баъди роҳпаймоӣ дар назди Қасри фарҳанг муовини раиси Кумитаи кор бо ҷавонон ва варзиш Ҳабибулло Амирбекзода ва муовини раиси шаҳри Ваҳдат Фарзона Ҳоҷазода дар назди иштирокчиёни Фестивал доир ба “Соли ҷавонон” ва ҷашни 20-солагии Рӯзи Ваҳдати миллӣ суханронӣ намуданд. Аз ҷумла, Фарзона Ҳоҷазода ҳозиринро ба муносибати 20-солагии Рӯзи Ваҳдати миллӣ ва “Соли ҷавонон” табик намуда иброз дошт: “Бори аввал дар шаҳри Ваҳдат, дар калонтарин майдон, ки бо дастгирии Пешвои миллат, муҳтарам Эмомалӣ Раҳмон сохта шуда истодааст, Рӯзи Ваҳдати миллӣ ҷашн гирифта мешавад. Мо - масъулини шаҳри Ваҳдат, тамоми кӯшиши худро ба он равона сохта истодаем, ки ин чорабинии бонуфӯзи кишварро дар сатҳи баланд доир намоем. Аз тамоми меҳмонон ва сокинони кишвар даъват мекунам, ки моро дар ҷашнгирии 20-солагии Рӯзи Ваҳдати миллӣ ҳамроҳӣ намоянд”.

Муовини раиси Кумитаи кор бо ҷавонон ва варзиш Ҳабибулло Амирбекзода низ ҳозиринро ба муносибати 20-солагии Рӯзи Ваҳдати миллӣ ва “Соли ҷавонон” шодбош гуфта афзуд, ки: “20 сол қабл, яъне 27 июни соли 1997, баъди музокироти тӯлонӣ ба хотири ҳифзи якпорчагии марзу буми кишвар, таъмини сулҳу субот, сарҷамъии миллат ва зиндагии ороми сокинони мамлакат Созишномаи умумии истиқрори сулҳ ва ризоияти миллӣ дар Тоҷикистон ба имзо расид, ки ин санади муҳим дар таърихи навини халқамон аз ҷумлаи асноди сарнавиштсоз ба ҳисоб меравад”.

Баъди суханронии масъулин аз номи ҳамаи иштирокчиёни Фестивал Парвина Набиева муроҷиатномаи ҷавононро ба самъи ҳозирин расонд.

Ҳамчунин дар назди Қасри фарҳанги шаҳри Ваҳдат бо иштироки ҳунармандон чорабинии фарҳангӣ доир карда шуд.

Дар доираи Фестивал ҷумҳуриявии дӯстии ҷавонон аёдати оилаҳои ниёзманд, намунавӣ ва иштикорчиёни ҷангу меҳнати шаҳри Ваҳдат сурат гирифта, аз ҷониби иштирокчиёни Фестивал туҳфаҳои хотиравии таъсисдодаи Кумитаи кор бо ҷавонон ва варзиш ба онҳо супорида шуд.

Баъд аз аёдати оилаҳо дар толори варзишӣ оид ба намудҳои гӯштини шаҳри Ваҳдат иштирокчиён ҷамъ омада, рафти мусобиқаи кушод оид ба гӯштини миллиро тамошо намуданд.

Худи ҳамин рӯз дар истироҳатгоҳи “Шоми Ваҳдат” аз ҷониби иштирокчиёни Фестивал чорабинии фарҳангӣ доир карда, дар бинои Кохи маърифати шаҳри Ваҳдат дар мавзӯи “Саодати миллат аз Ваҳдат аст”, бо иштироки масъулини Кумитаи кор бо ҷавонон ва варзиш конференсияи ҷумҳуриявӣ баргузор гардид.

Хуршед МАВЛОНОВ, “ҶТ”