Дар арафаи Иди саиди Фитр, “20-солагии Ваҳдати миллӣ” ва “Соли ҷавонон” аз ҷониби волонтёрон бо дастгирии Кумитаи кор бо ҷавонон ва варзиш ба тарбиятгирандагони мактаб-интернати ноҳияи Қубодиён кӯмаки моддӣ бо ташкили суфраи идона ва чорабинии фарҳангӣ баргузор карда шуд.

Зимни суханронии хеш масъулини Шаҳзод Раҳимов, сардори Раёсати кор бо ҷавонони Кумитаи кор бо ҷавонон ва варзиш таълимгирандагони ин боргоҳи илму маърифатро ба 20-солагии Рӯзи Ваҳдати миллӣ ва “Соли ҷавонон” табрик намуд. Иброз гардид, ки барои ба камол расонидани насли ҷавон аз ҷониби Ҳукумати кишвар, бахусус Пешвои муаззами миллат ҳамеша тадбирҳои судманд андешида мешавад ва маҳз таваҷҷуҳ ва ғамхориҳои пайвастаи Президенти маҳбубамон, муҳтарам Эмомалӣ Раҳмон аст, ки имрӯз мавқею мартабаи сиёсати давлатии ҷавонон дар баландтарин ҷойгоҳ қарор дорад.

Аз ҷавонон давъат ба амал оварда шуд, то вазифаи ҷонии худро, ки бо баҳои хубу аъло, ахлоқи ҳамида ва бо маърифати баланди инсони хатм намудани ин муассиса мебошад, самаранок иҷро кунанд.

Сипас ба тарбиятгирандагон либосҳое, ки аз ҷониби Кумитаи кор бо ҷавонон ва варзиш омода гардида буданд, дастрас карда шуд ва ҳамчунин суфраи идона ороста, баҳри болидахотир намудани ин насли осебпазир барномаи фарҳангӣ бо рақсу бозии мактаббачагон баргузор карда шуд.

Ёдовар мешавем, ки Кумитаи кор бо ҷавонон ва варзиш дар арафаи ҷашнҳои миллӣ барои таълимгирандагони мактаб-интернати ноҳияи Қубодиён ҳамеша кӯмаку чорабиниҳои мухталифро баргузор менамояд.