Таҳти унвони “Ваҳдат - нишони пойдории давлат ва бақои миллат” дар ноҳияи Ванҷ конфронси ноҳиявӣ баргузор гардид, ки дар он намояндагони Мақомоти иҷроияи маҳаллии ҳокимияти давлатии ноҳия, роҳбарони бахшҳои кор бо занон ва оила, кор бо ҷавонон ва варзиш, Коллеҷи тиббӣ ширкат варзиданд.

Шоҳзода Рустами Мастам, муовини раиси ноҳия конфронсро ифтитоҳ намуда изҳор дошт, ки Ваҳдат неъмати бузург, кафолати суботу оромӣ мебошад:“То он даме, ки Ваҳдат поянда аст, кишвар дар ҳоли рушду ободӣ қарор дорад. Моро зарур аст, ки арзиши ин ганҷро дар замири хеш бипарварем ва ба хотири таъмини амнияти бардавом аз ҳамаи роҳу усулҳо истифода намоем”.

Инчунин, Масрур Ғайратов, мудири Бахши кор бо ҷавонон ва варзиш, Моҳшариф Хомӯшова, корманди Бахши кор бо занон ва оила, Азимҷон Шамсудинов, раиси ҲХДТ–и ноҳия, Пайшанбе Шоев, сармуҳаррири рӯзномаи “Ватан” дар мавзӯҳои “Ҷавонон–ҳомиёни Ваҳдати миллӣ”, “Нақши занон дар таъмини сулҳу субот ва Ваҳдати миллӣ”, “Ваҳдат ва хотираи таърихӣ”, “Аҳамияти таърихии Ваҳдати миллӣ дар пойдории давлати навини тоҷикон” маърӯза карданд.

Машҳур ИМОМНАЗАРОВ, “ҶТ”