Бо ташаббуси раёсатҳои кор бо ҷавонон ва варзиш, назорати маводи нашъаовари назди Президенти Ҷумҳурии Тоҷикистон дар вилояти Хатлон ба муносибати Рӯзи байналмилалии маводи нашъаовар дар ҷамоати шаҳраки “Ёвон”-и ноҳияи Ёвон чорабинии фарҳангӣ доир гардид.

Мақсад аз баргузории ин чорабинӣ пешгирии нашъамандӣ ва нашъаҷаллобӣ миёни аҳолӣ, махсусан миёни ҷавонон мебошад.

Азиз Азимов, муовини сардори Раёсати кор бо ҷавонон ва варзиши вилоят зимни ин чорабинӣ иброз дошт, ки “Вобаста ба хатарҳои ҷаҳонии терроризму экстремизм ва муомилоти ғайриқонунии маводи нашъаовар ҳар яки моро мебояд, ки зиракии сиёсиро аз даст надода, бо эҳсоси баланди ватандӯстиву арҷгузорӣ ба оину суннатҳои миллӣ ҷиҳати ҳифзи амнияти ҷамъиятӣ, саломатии аҳолӣ ва пойдории фазои сулҳу осоиштагӣ дар кишвар фаъолият намоем”.

Дар чорабинӣ дастовардҳои 15 нафар варзишгарон ва расмҳои беҳтарин, ки маҳсули дасти кӯдакон мебошанд, намоиш дода шуд ва беҳтаринҳо бо туҳфаҳо қадрдонӣ шуданд.

Умед Мирзоев, “ҶТ”