Чанде пеш дар шаҳри Остонаи Ҷумҳурии Қазоқистон бо ташаббуси Ассотсиатсияи байналмилалии донишҷӯён ва дастгирии Иттиҳодияи шахсони ҳуқуқии “Ҳаракати умумимиллии Бобек”-и Ҷумҳурии Қазоқистон дар ҳамкорӣ бо Иттиҳоди Давлатҳои Мустақил ва Китобхонаи илмии электронии “eLIBRARY.RU”-и Федератсияи Русия ҷиҳати дарёфти беҳтарин донишҷӯи кишварҳои ИДМ дар соли 2023 озмун баргузор гардид. Ҷоизаи озмуни мазкурро Мубориз Акбарзода, донишҷӯи Донишгоҳи миллии Тоҷикистон ба даст овард. Дар зер суҳбати хабарнигори рӯзномаи “Ҷавонони Тоҷикистон” бо Мубориз Акбарзода перомуни чигунагии баргузории озмун ва талошҳои ӯ барои расидан ба ин мақом пешкаши хонанда мегардад.

- Сараввал шуморо барои сазовор шудан ба чунин як ҷоизаи арзишманд табрик менамоем.

- Ташаккури зиёд!

- Мегуфтед, ки озмун дар кадом сатҳ баргузор гашт ва ғолибон чӣ гуна муайян гардиданд?

- Сатҳи баргузории озмун хеле хуб буд ва бештар донишҷӯён аз донишгоҳҳои олии кишварҳои Арманистон, Беларус, Қазоқистон, Қирғизистон, Озарбойҷон, Русия, Тоҷикистон, Ӯзбекистон, Турк-манистон ва Украина иштирок намуданд. Ғолиби озмуни мазкур тавассути анкетаҳои пешниҳодкардаи довталаб муайян мешавад. Яъне, нафаре ки аз дигарон дида дастовардҳои зиёд дар соҳаи илм, фарҳанг ва ё варзиш дорад, ҳамчун ғолиб эътироф мегардад. Дар баробари ин, ҳамаи дастовардҳои дохиливу хориҷӣ ба назар гирифта мешавад.

- Расидан ба унвони “Беҳтарин донишҷӯи ИДМ” бароятон осон буд ё хайр?

- Дар зиндагӣ ҳадаф ягона роҳест, ки инсонро ба мақсад мерасонад. Ҳадаф будани инсонро муайян мекунад. Он қувваи таҳрикдиҳандаест, ки инсонро ба кор медарорад. Зиндагӣ бо мақсад ва ҳадаф зебост. Ҳар як ҳадаф нақшаи пештаҳияшударо талаб мекунад. Ман ҳанӯз дар синфи 11 ин ҳадафро гузошта будам. Барои амалишавии ин ҳадаф пайваста талош кардам ва ба ин натиҷа расидам. Ин ҳоло анҷоми кор нест. Якчанд озмунҳои ҷумҳуриявию байналмилалии дигар дар пеш аст. Умедворам дар онҳо низ иштирок карда, муваффақ хоҳам шуд.

- Пеш аз ин дар ягон озмуни дохилӣ ва ё байналмилалӣ иштирок доштед?

- Бале. Дар озмуни ҷамъбастии Донишкадаи Конфутсияи назди Донишгоҳи миллии Тоҷикистон дар нимсолаи якуми соли хониши 2022-2023 аз забони чинӣ иштирок кардам ва сазовори ҷойи аввал низ гардидам. Ҳамзамон, барандаи шоҳҷоизаи аввалин маҳфили-викторинаи “Сиёсатшиносони ҷавон” дар мавзуи “Интихобот ва системаҳои интихоботӣ” ва гирандаи стипендияи Президенти Ҷумҳурии Тоҷикистон дар соли хониши 2020-2021 будам.

- Нақши чунин озмунҳоро дар дигаргун шудани ҷаҳонбинии донишҷӯён ва афзоиши сатҳи дониши онҳо чӣ гуна баҳо медиҳед?

- Чунин озмунҳо боис мегардад, то масъулият бештар шавад. Вақте донишҷӯ дар чунин озмунҳо иштирок мекунад, дар ӯ таҳаввулот ба амал меояд ва ин таҳаввулот боис мегардад, то бештар ба мутолиа машғул шавад. Донишҷӯ кӯшиш мекунад, ки ҳар чӣ бештар донишҳои навро ба даст оварад, то дар озмунҳои сатҳи байналмилалию минтақавӣ сазовори ҷойи намоён гардад. Ногуфта намонад, ки дар кадом сатҳ қарор доштани дониши донишҷӯ низ маҳз тавассути чунин озмунҳо фаҳмида мешавад.

- Ба назари шумо озмунҳои дохили ҷумҳуриявӣ аз озмунҳои байналмилалӣ чӣ тафовут доранд?

- Тоҷикистон мисли дигар давлатҳо пайваста озмунҳои ҷумҳуриявию байналмилалиро мегузаронад. Махсусан, Донишгоҳи миллии Тоҷикистон дар баргузории олимпиадаҳои фаннӣ хеле пешсаф аст. Озмунҳои дохилӣ дар сатҳи баланд баргузор мешаванд, аммо ҳар чи набошад, талабот дар сатҳи байналмилалӣ ва ё минтақавӣ зиёдтар аст ва рақобат низ хеле шадид мегузарад.

- Аз хурдӣ орзуи сиёсатшинос шуданро доштед ё сабаби ба ин пеша пой ниҳоданатон омили дигар дошт?

- Дар ихтисосам тасодуфӣ нестам. Ин ихтисос ба ман хеле писанд аст. Чунки баҳси сиёсӣ ва ё баррасии масъалаҳои сиёсӣ барои ман хеле шавқовар мебошад. Барои дуруст сарфаҳм рафтани раванди сиёсӣ устодон ба мо кумак мерасонанд, ки аз онҳо хеле сипосгузорем.

- Назари шумо дар бораи ҷавонони имрӯза чӣ гуна аст?

- То мо мушкилотро эътироф накунем, роҳи ҳалли онро низ намеёбем. Баъзе ҷавонон имрӯз камфаъол ва камталошанд. Барои ба даст овардани донишҳои нав ва ғанӣ гардонидани олами маънавии худ кам кӯшиш мекунанд. Хоҳиши нахондан ва камфаъол будани ҷавонон сарчашмаи худро ҳанӯз аз оила мегирад. Оилае, ки солим аст ва дар он волидайн боахлоқу соҳибмаърифатанд, табиист, ки фарзанд низ чунин ба воя мерасад. Чунки олами гирду атроф ба кӯдак таъсири бениҳоят бузург мерасонад. Заминаи асосӣ барои соҳибилму дорои ахлоқи ҳамида будани кӯдаку ҷавон оила аст. Мактаб низ дар ин замина нақши муассир дорад. Сабаби дигари камтаваҷҷуҳии баъзе ҷавонон ба илм ин шабакаҳои иҷтимоӣ мебошад. Имрӯз ҷавонон шабакаҳои иҷтимоиро дуруст ва самаранок истифода намебаранд. Ин амал вақти хондану илм ба даст овардани онҳоро танг кардааст.

- Тавсияи шумо ҳамчун як ҷавони муваффақ ба ҳамсолонатон?

- Пеш аз ҳама худро аз амалҳои номатлуб дур нигоҳ доранд. Ҷавонон бояд хуб дарк намоянд, ки онҳо ояндаи миллатро таъмин менамоянд. Аз ин лиҳоз, зарфиятҳои илмии худро бояд баланд бардоранд. Ҳамчун ворисони ахтарони адаб, соҳибадабу соҳибмаърифат бошанд. Ба ватан содиқонаву софдилона хизмат намоянд.

Ҳошим РАҲМАТУЛЛОЕВ, “ҶТ”