Бо ибтикори Раёсати Вазорати корҳои дохилии Ҷумҳурии Тоҷикистон дар ВМКБ дар Донишгоҳи давлатии Хоруғ (ДДХ) мулоқоти кормандони сохторҳои қудратӣ бо устодону донишҷӯён доир гашт.

  Дар вохӯрӣ Абдулваҳҳоб Искандарзода, сардори Раёсати Вазорати корҳои дохилии вилоят, Мамадризо Алимшоев, ноиби ректор оид ба таълим, Зиёдулло Азизуллоев, мудири шӯбаи ВКД - и шаҳри Хоруғ иштирок ва суханронӣ намуданд.

Мамадризо Алимшоев, ноиби ректори ДДХ, зимни сухани ифтитоҳӣ аз хусуси ҳамкории судманди донишҷӯён бо ниҳодҳои қудратӣ изҳори қаноатмандӣ намуда, аз ҷумла иброз дошт, ки маҳз дар ҳамбастагӣ метавон суботу оромии комили ҷомеаро таъмин сохт ва барои рафъи кору аъмоли зишт миёни ҷавонон чунин тамоюлро минбаъд ҳам бояд тақвият дод.

- Ҷиҳати пешрафти ҳаёти сиёсӣ-иҷтимоӣ, илмию фарҳангӣ ва ба ин васила пурзӯр намудани тартиботи ҷамъиятӣ байни аҳолӣ равшанфикрону зиёиён ва омӯзгорону аҳли маорифро низ лозим аст, ки бо мақомот иртиботи наздик дошта бошанд, - афзуд мавсуф.

Абдулваҳҳоб Искандарзода, сардори РВКД дар ВМКБ донишҷӯёнро ба муносибати Соли ҷавонон эълон гардидани соли 2017 табрику шодбош намуда, барои таҳсили пурсамар, созандагӣ ва хештаншиносиву меҳанпарастӣ ба онҳо барору комёбиҳо таманно кард.

Сипас масъулини РВКД чанд тан аз донишҷӯёнро аз номи вазири корҳои дохилии кишвар Раҳимзода Рамазон ба хотири иштироки фаъол дар корҳои ташвиқотиву тарғиботӣ, чорабиниҳои сиёсӣ, фарҳангӣ, варзишӣ ва конфренсияҳои илмиву амалӣ вобаста ба пешгирии ҷинояткорӣ бо “Ифтихорномаи фахрӣ” ва тӯҳфаҳои хотиравӣ қадр намуданд.