Бо ташаббуси Кумитаи ҷавонон, варзиш ва сайёҳӣ 1-4 феврали соли равон дар шаҳру ноҳияҳои Норак, Хуросон, Қубодиён ва Носири Хусрав дар мавзӯи “Иштироки ҷавонон дар бартарафсозии омилҳои номатлуби иҷтимоӣ” бо иштироки муовинони раисони шаҳру ноҳияҳо, прокуророн, намояндагони вазорату идораҳои дахлдор ва ҷавонон аз ҷамоатҳои деҳот мизи мудаввар баргузор гардид.

Дар вохӯриҳо масъулини Раёсати кор бо ҷавонони Кумитаи ҷавонон ва намояндагони вазорату идораҳои дахлдор дар баромадҳои хеш оид ба масъалаҳои пешгирии омилҳои номатлуби иҷтимоӣ, таҳлил ва баррасии вазъияти ҷинояткорӣ ва қонунвайронкуниҳо дар байни наврасону ҷавонон, вазъи иҷтимоии имрӯзаи ҷаҳон ва эмин нигоҳ доштани насли ҷавон аз ҳар гуна суистифодаи нерӯҳои манфиатдор ва дигар хатарҳои фаромиллӣ, аз қабили терроризм, ҷинояткории муташаккилона ва экстремизми динӣ, инчунин баланд бардоштани сатҳи маърифати онҳо, парвариши эҳсоси ифтихори ватандорӣ, таҳаммулгароӣ ва инсондӯстии ҷавонон андешаронӣ карданд.