Ҳар як шахс бояд дарк кунад, ки барои зиндагии хуб доштан, соҳиби касбу ҳунар будан шарт аст. Зеро соҳибкасб ба осонӣ метавонад, рӯзгорашро пеш барад. Аз ҳамин хотир ҷавонон бояд аз наврасӣ касб интихоб намояд ва барои онро соҳиб шудан, талош варзанд.

Масрур Алибахшев ҷавонест, ки бо интихоби дурусти касб имрӯзҳо зиндагии хуберо пушти сар мекунад. Ӯ бо маҳорати хоси худ имрӯзҳо дар яке аз калонтарин тарабхонаи шаҳри Уфаи Русия - “Jonny cake” ба ҳайси тортпаз фаъолият мекунад.

Чи гунае, ки худаш мегӯяд, аз хурдсолӣ дӯстдори ширинӣ буду ҳамеша аз модар хоҳиш мекард, ки барояш шириниҳои балаззат омода кунад.

Масрур баъди хатми синфи 9 тасмим гирифт, ки барои ёд гирифтани нозукиҳои кулчақандпазӣ берун аз кишвар таҳсили илм кунад. Ҳамин тавр ба Федератсияи Русия сафар карда, дар як корхонаи қаннодӣ ҳунар омӯхт. Аз шавқу рағбати зиёд доштан нисбати пухтупази шириниҳо дар муддати кӯтоҳ ин ҳунарро аз худ кард ва фаъолияташро дар тарабхонаи “Jonny cake” шаҳри Уфа оғоз намуд.

- Ман аз касбу ҳунари доштаи худам ҳаргиз нороҳат нестам, зеро ки ҳунарам имрӯз маро аз ҳама мушкилиҳои зиндагӣ раҳо мекунад. Гарчанде ин касб бештар ба бонувон тааллуқ дорад, аммо ҳаргиз аз он шарм намедорам ва бо итминони комил гуфта метавонам, ки боз ба қуллаҳои баландтар хоҳам расид, - гуфт ӯ.

На ҳар ҷавонписар касби пухтупазро пеша мекунад. Аммо Масрур барои зиндагии ором доштану хушбахт шудан, ба гуфтаи атрофиён эътибор намедод. Ҳатто чанд муддате наздикон зидди касби ӯ буданд ва намехостанд, ки бо касби тортпазиаш машҳур шавад. Бо мурури замон пай бурданд, ки фарзанди онҳо бо ҳунари худ мардумро хушҳол мекунад, баъдан ӯро дастгирӣ карданд.

Ҳангоми суҳбат яке аз наздикони ин ҷавон гуфт, ки Масрур аз хурдӣ вақти зиёдашро дар ошхона мегузаронд ва пайваста аз модар доир ба тарзи омода кардани шириниҳо мепурсид.
Масрур ҳозир 18 сол дорад ва аллакай зиндагии худро мустақилона пеш мебарад. Ӯ ҳатто барои бартараф кардани мушкилиҳо ба хонаводаи худ ёрӣ мерасонад.

- Устоди ман дар омода кардани шириниҳо аввал модарам аст, баъдан аз шабакаҳои интернетӣ истифода бурда, худомӯзӣ мекунам. Аз наворҳои интернет дар омода кардани шириниҳо истифода мебарам. Имрӯз муштариёни ман на фақат дар тарабхонаи “Jonny cake” ҳастанд, балки бо фармоиш низ ба дигарон хизматрасонӣ мекунам. Бештар барои тӯю ҷашнҳои мардуми шаҳри Уфа ширинӣ мепазам. Онҳо ба маҳорати ман ҳамеша баҳои баланд мегузоранд ва ин маро водор месозад, ки боз ҳам беҳтар кор кунам,-гуфт Масрур.
Масрур ҳамчунин ба шогирдон ҳунари худро омӯзонида, имрӯзҳо шогирдони зиёд дорад.

- Тайёр кардани ширинӣ ва оро додани он хеле нозук аст, зеро на ҳамеша ба осонӣ онро омода мекунам. Пеш аз пухтани як кулчақанд худамро хеле ором мекунам, чунки корҳои зиёдро ба сомон мерасонам. Пухтани як ширинӣ вақти зиёдро талаб мекунад ва кӯшиш мекунам, ки натиҷаи хуб диҳад. Ҳамеша бар онам, ки муштариёнам бе ягон мушкил фармоиши худро дастрас кунанд”,-гуфт дар идомаи суҳбат Масрур.