ҶАВОНОН
Душанбе 14 Октябр 2019 05:54
2479
МУАЛЛИФ: МАШҲУР ИМОМНАЗАР

Бо ташаббуси шуъбаи кор бо ҷавонони Донишгоҳи давлатии Хоруғ ба номи Моёншо Назаршоев таҳти унвони «Ҷавонон ва ҷаҳони имрӯза» конфронси илмӣ – маърифатӣ баргузор гардид, ки дар он намояндагони Раёсати ҷавонон, варзиш ва сайёҳии ВМКБ, аҳли зиё ва устодону донишҷӯён ширкат доштанд.

Мудири шуъбаи кор бо ҷавонони ДДХ Юсуф Асадбеков изҳор дошт, ки ҷавонон бояд дар пешрафт ва рушди Ватани азиз камари ҳимат банданд ва дар ҳаёти сиёсиву иҷтимоии он беш аз пеш фаъол бошанд. Тақдири имрӯзу ояндаи худро дар даст дошта, баҳри амнияти давлат ва шарафу номуси ватандорӣ то охирин нафас ғайрат намоянд.

Ректори ДДХ, профессор Шермамад Ҷонмамадов зимни баромади худ таъкид дошт, ки Пешвои миллат, муҳтарам Эмомалӣ Раҳмон ва Ҳукумати кишвар ҷавононро неруи ниҳоят пуриқтидор, бунёдкор ва пешбарандаи ҳаёти ҷомеа мешуморанду ба сиёсати давлатии ҷавонон аз рӯзи аввали Истиқлолияти давлатӣ диққати ҷиддӣ медиҳанд. Ҷавобан ба ин ғамхориҳо ҷавонони тоҷик дар амал бояд тамоми талошҳои хешро барои донишандузӣ, интихоби касбу ҳунарҳои муосир, тараққиёт ва ободии сарзамини аҷдодӣ, рушди илму техника ва бунёдкорӣ равона созанд.

Сомон Қурбонмамадов, ноиби ректор оид ба тарбия дар мавзӯи «Нақши Консепсияи миллии тарбияи Ҷумҳурии Тоҷикистон дар ташаккули ҷавонон» маърӯза намуда, иброз дошт, ки Консепсияи миллӣ дар марҳилае рӯи кор омад, ки кишвар аз бозсозии баъдиҷангӣ ва барқарорсозии пурра баромада буд.

- Консепсия дар даврае мавриди баррасӣ қарор гирифт, ки миллат яке аз муқаддасоти муҳими худ - Ваҳдати миллиро ба даст овард. Яъне он замоне пешниҳоду тасдиқ гардид, ки Тоҷикистон ҳамчун давлат пойдевори мустаҳаками худро доро буд, - афзуд С. Қурбонмамадов.

Омӯзгори кафедраи биоэкология ва туризм Рамзия Назарбекова дар маърӯзаи худ оид ба «Захираҳои обӣ ҳамчун асос барои ташкили туризм ва реакратсия» баромад карда, гуфт, ки ВМКБ аз ҷиҳати захираҳои обӣ хеле бой аст. Бинобар ин воридшавии сайёҳон сол аз сол ба вилоят зиёд шудаасту ин аз он гувоҳӣ медиҳад, ки вилоят аз чашмаҳои шифобахш, пиряхҳо ва кулҳо ғанӣ аст.

- Ҳар яке аз чашмаҳои вилоят хусусияти шифобахшӣ дорад. Ғайр аз ин дар ҳудуди вилоят шумораи зиёди кӯлҳои ҷорӣ ва баста мавҷуданд, ки қариб 83 фисади кӯлҳои Тоҷикистонро ташкил медиҳанд ва барои туризми экологӣ мусоиданд, - гуфт Р. Назарбекова.

Сипас, Сураҷ Чоршанбиев, муовини сардори Раёсати ҷавонон, варзиш ва сайёҳии ВМКБ, Ёралӣ Холдоров, донишҷӯи курси 3-и факултаи биологияи ДДХ, Рудоба Чаманова, донишҷӯи курси 1-и факултаи филологияи ДДХ дар мавзӯъҳои «Ҷавонон - созандагони Ватан», «Масъалаҳои тарбия дар сиёсати давлатии ҷавонон»,  «Ҷавонон қувваи бузург ва неруи созанда» маърӯза карданд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Октябр 2019 c.