Дар ҳошияи силсилавохӯриҳо оид ба соли ҷавонон 25-уми апрел дар хобгоҳи №4-и Донишгоҳи техникии Тоҷикистон ба номи академик М. Осимӣ, мулоқоти намояндагони Кумитаи ҷавонон варзиш ва сайёҳӣ, Кумитаи кор бо занон ва оила, Кумитаи оид ба корҳои дин, танзими анъана ва ҷашну маросимҳои миллӣ ва Маркази ҷумҳуриявии ташаккули тарзи ҳаёти солим бо донишҷӯён баргузор гардид.

Шоҳзод Раҳимов, сардори раёсати кор бо ҷавонони Кумитаи ҷавонон, варзиш ва сайёҳӣ зимни суханронии ифтитоҳии худ таъкид кард, ки “ҷавонон нерӯи созанда ва пешбарандаи ҳар қавму миллатанд. Аз ин рӯ ҷавонони бо нангу ори моро мебояд баҳри пешбурди тамоми соҳаҳои кишвар камари ҳиммат банданд ва пайваста баҳри ин талош намоянд.”

Инчунин гуфта шуд, ки дар раванди ҷаҳонишавӣ ҷавонон бояд бо донишҳои фанниву техникӣ пурра муҷаҳҳаз бошанд, то дар ин раванд тавонанд аз миллати худ дифоъ кунанд ва аз ҳамсолони хориҷии худ ақиб намонанд.

Дар фарҷоми мулоқот байни донишҷӯён ва намояндаҳо суҳбати озод ва суолу ҷавоб сурат гирифт, ки дар натиҷаи он чанд пешниҳоду дархостҳои донишҷӯёнро масъулин ба хушнудӣ пазируфтанд.

Хуршед ХОВАРӢ “ҶТ”