Дар Китобхонаи миллии Тоҷикистон Конфронси илмӣ - амалӣ таҳти унвони “Паёми Пешвои миллат - таҳкимбахши ватандорӣ ва ҳуввияти миллии ҷавонон” доир гардид. Дар он Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Раҳмонзода Абдуҷаббор Азизӣ, намояндагон аз Дастгоҳи иҷроияи Президенти Ҷумҳурии Тоҷикистон, Маҷлиси намояндагони Маҷлиси Олии Ҷумҳурии Тоҷикистон, роҳбарони вазорату идораҳои дахлдор, масъулин аз донишкадаву донишгоҳҳои олии касбии кишвар, ҷоизадорони ба номи Исмоили Сомонӣ, гирандагони Стипендияи президентӣ ва шаҳрӣ, гирандагони Стипендияи Кумитаи кор бо ҷавонон ва варзиш, олимону муҳаққиқони ҷавон, волонтёрон ва як қатор ҷавонони фаъоли кишвар иштирок намуданд.

Дар оғоз Абдуллозода Аҳтам, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон суханронӣ карда, ҳозиринро ба конференсия хушомадед гуфт ва иброз дошт, ки: “Дар Паёми охирини Пешвои миллат ба Маҷлиси Олии кишвар дар баробари дигар масъалаву мавзӯъҳо ба самту соҳаи ҳаёти ҷавонон низ таваҷҷуҳи хосса зоҳир карда шуд ва ҳамасола мунтазам дар сатҳи баланди ҷамъиятиву сиёсӣ қайд кардани тамоми чорабиниву ҳамоишҳои марбут ба ҷавонони кишвар шаҳодати ғамхориҳои пайвастаи давлату Ҳукумат нисбат ба насли ҷавони кишвар мебошад. Ҳар тадбире, ки дар мамлакат амалӣ карда мешавад, пеш аз ҳама, барои беҳбудии ҳаёти ҷавонон ва ояндаи неки Тоҷикистон нигаронида шудааст”.

Баъдан Раҳмонзода Абудҷаббор Азизӣ, суханронӣ карда, гуфт: “Мо ҳамагон шоҳид будем, ки дар Паёмашон Пешвои миллат муҳтарам Эмомалӣ Раҳмон чӣ гуна масъалагузориҳо карданд ва аз дастоварду пешрафти соҳаҳо ва камбудиву мушкилоти ҷойдошта низ ҳарф заданд. Маҳз соҳаи ҷавонон ва худи ҷавононро чун ҳарвақта аз мадди назари хеш дур намонданд. Ман фақат ҳаминро мехоҳам гӯям, ки шумо ҷавонони азиз бояд аз дастуру роҳнамоиҳои Роҳбари давлат босамар ва дуруст истифода баред ва барои сохтани ояндаи дурахшони худ ва кишварамон талоши бештар аз пештар варзед. Беҳуда нест, ки шумо ҷавононро Пешвои миллат пайваста ояндаи давлату миллат меноманд”.

Минбаъд дигар афроди масъул аз вазорату кумитаҳо низ доир ба паҳлуҳои мухталифи Паёми Президенти кишвар муҳтарам Эмомалӣ Раҳмон, ки ба соҳаҳояшон дахл дошт, ибрози назар карданд.

Ҳозирин аз таваҷҷуҳи бевоситаи роҳбарияти давлату Ҳукумати мамлакат нисбат ба ҷавонон суханронӣ карда, зикр намуданд, ки ҷавонон бояд аз ҳама қишрҳои ҷомеа бештар фаъол бошанд. Ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои Истиқлолиятро ҳифз кунанд. Дар ҳаёти сиёсиву иҷтимоии Тоҷикистон бо дасту дили гарм ва неруи бунёдгарона ширкат варзида, амнияти давлат ва шарафу номуси ватандориро ҳимоя намоянд.