Ҷавонӣ ва ҷавонон ду мафҳумеанд, ки пайваста дар ҷомеаи фарҳангии Тоҷикистон мавриди гуфтугузор қарор мегиранд ва болои ин мафҳумҳо қариб тамоми ҷомеаи шаҳрвандӣ кор мебаранд. Ҳамин аст, ки ҳатто дар ноҳияҳои дурдаст ва сарҳадии кишвар низ ҳамеша ҷавонон мавриди ғамхориву дастгирии Ҳукумати кишвар қарор доранд. Доир ба фаъолияти ҷавонони ноҳияи Қубодиён суҳбате доштем, бо Ҷӯрабек Назаров, мудири бахши кор бо ҷавонон ва варзиши ноҳия.

- Пас аз “Соли ҷавонон” эълон гардидани соли 2017 чӣ навгониҳое дар ҳаёти ҷавонони ноҳия ба чашм мехӯрад ва онро чӣ гуна баҳо медиҳед?

- Бахши кор бо ҷавонон ва варзиши ноҳияи Қубодиён, фаъолияти худро дар асоси дастуру супоришҳои Пешвои миллат ва роҳбарияти Кумитаи кор бо ҷавонон ва варзиш ба роҳ монда, дар миқёси ноҳия пайваста чорабиниҳои фарҳангиву таблиғотиро миёни ҷавонон баргузор менамояд. Пас аз он ки бо ибтикори Пешвои миллат соли 2017 ҳамчун “Соли ҷавонон” эълон гардид, дар ҳаёти ҷавонони ноҳия як қатор пешравиҳо ва муваффақиятҳои назаррас ба амал омад. Агар то соли ҷорӣ бахши ҷавонон он қадар фаъолияти густурда надошт ва ҳамчун як ниҳоди серсоҳа ва серталабот дар байни мардум, махсусан ҷавонон дониста мешуд, аммо имрӯз ҳар ҷавони ноҳия моро ҳамчун як ниҳоди таҳрикдидҳанда қабул дорад ва робитаи мо бо ҷавонон хеле қавӣ гаштааст. Агар то имсол бахши кор бо ҷавонон ва варзиш дар як утоқ дар бинои мақомоти иҷроияи ноҳия ҷойгир буд, имсол мо тасмим дорем, ки барои боз ҳам муттаҳид кардани ҷавонони ноҳия як маркази ҷавонон ташкил кунем. Қариб дар тамоми самтҳо ҷавонон фаъолияти густурда доранд.

- Дар кадом самти фаъолият ва соҳаҳо ҷавонон нисбатан пешрафтатаранд?

- Бояд иқрор шуд, ки ноҳияи Қубодиён аз нигоҳи саноат технологияҳои навин ва тиҷорат он қадар пешрафта нест. Аз ин рӯ дар ин самтҳо ҷавонон низ фаъолияти густурда надоранд. Ҷавонони ноҳия дар соҳаи маориф ва тиб ва кишоварзӣ нисбатан муваффақанд ва метавонем гуфт дар ин соҳаҳо муваффақиятҳои чашмрасеро соҳибанд. Зиёда аз 50-60 фисади кормандони соҳаҳои мазкурро ҷавонон ташкил медиҳанд.

- Тавре шоҳидем, ҷаҳони муосирро равандҳои тахрибкоре дар мисоли гурӯҳҳои хусусияти террористиву экстремистидошта ба худ андармон кардааст ва ҷомеаи ҷаҳонӣ алайҳи ин дар пайи муборизаанд. Мувофиқи маълумот аз ноҳияи Шумо низ ҷавонони зиёде дар сангарҳо қарор доранд. Инро чӣ гуна шарҳ медиҳед?

- Мутаассифона аз ду деҳаи ноҳияи Қубодиён ҷавонони зиёде, ки дониши кофии диниву дунявӣ надоштанд, ба сафи ин гурӯҳҳои ифротиву террористӣ ва як қисмат ба сафи ҷангиёни “ДИИШ” пайвастаанд. Дар асоси таҳлилҳо ба мо маълум гардид, ки аксари ҷавонони дар сафи ҷангиёни “ДИИШ” қарордоштаи ноҳия аз муҳоҷирати меҳнатӣ, аз Русияву дигар кишварҳо ба воситаи давлати Туркия ба хоки Сурия афтодаанд.

Дар ҳамкорӣ бо дастгоҳи ҳукумати ноҳия ва дигар ташкилоту идораҳо ҷиҳати фаҳмондадиҳии ин вабои аср пайваста талош меварзем. Худи ҳамин сол даҳҳо маротиба чорабиниҳои фаҳмондадиҳӣ миёни ҷавонон гузаронидем. Аз ҷумла санаи 22-июни соли ҷорӣ бо иштироки намояндаи дастгоҳи марказии КҶВ Шоҳзод Раҳимов ва сардори Раёсати кор бо ҷавонон ва варзиши вилояти Хатлон Фариза Абдуллозода чорабинӣ гузаронида шуд.

- Чунонки гуфтед, аксари ҷавони ба сафи равияҳо ифротӣ пайваста, аз ҳисоби ҷавонони дар муҳоҷирати меҳнатӣ қарордошта мебошанд. Мегуфтед, ки барои бо ҷойҳои нави корӣ таъмин кардани ҷавонон дар ноҳия чӣ чораҳо андешида мешавад?

- Чун ноҳияи мо ноҳияи аграрӣ аст, дар ин ҷо ҷойҳои нави корӣ аксаран аз ҳисоби хоҷагиҳои навтаъсиси деҳқонӣ ташкил карда мешаванд. Барои бо ҷойҳои нави корӣ ҷалб намудани ҷавонон ҳамеша кӯшиш ба харҷ медиҳем ва Ҳукумати ноҳия низ нақшаи аз ҳисоби ҷавон таъмин кардани кадрҳои роҳбарикунандаро низ дар назар дорад. Айни ҳол аз ҳисоби ҷавонон шумораи кадрҳои роҳбарикунанда дар ноҳия ба 65 нафар мерасад.

- Дар варзиш чӣ дастовардҳо доред?

- Дар мусобиқаҳои сатҳи вилоятиву ҷумҳуриявӣ варзишгарони ноҳия ҷойҳои намоёнро ишғол карда, то сатҳи мусобиқаҳои байналмилалӣ баромаданд. Дар соли ҷорӣ варзишгарони ноҳия 2 маротиба дар мусобиқаҳои байналмиллалӣ ширкат варзида, 1 медали тилло, 1 биринҷӣ, ҷамъ 2 медали байналмилалӣ ба даст оварданд. Кӯшиш мекунем, дар ҳамкорӣ бо мактабҳои варзишӣ ва клубҳои ноҳия теъдоди иштирокчиёни мусобиқаҳои байналмилалиро то ҳадди имкон зиёд кунем.

- Ба ҳамсолони худ чӣ гуфтанӣ доред?

- Ҳамчун ҷавони парваришёфтаи даврони истиқлол аз кулли ҷавонони кишвар фақат як чизро таманно дорам, ки ба қадри истиқлолу неъматҳои ин даврон бирасанд ва дар партави сиёсати хирадмандонаи Пешвои миллат баҳри ободии меҳани азизи хеш саҳмгузор бошанд.

Хуршед ХОВАРӢ ,“ҶТ”