Дар ноҳияи Мастчоҳ бахшида ба Рӯзи ҷавонони Тоҷикистон вохӯрии раиси ноҳия Ғайрат Азиззода бо ҷавонон баргузор гардид.

Раиси ноҳия дар баромади хеш нахуст доир ба неъмати бебаҳо, истиқлолият суханронӣ намуда, иброз дошт: “мардуми шарифи тоҷик соли ҷорӣ 28-солагии Истиқлолияти давлатии Ҷумҳурии Тоҷикистонро бо ифтихормандӣ ҷашн мегирад. Воқеан, Истиқлолият волотарин ва пурарзиштарин дастоварди миллати тоҷик буда, рамзи соҳибдавлатӣ ва ватандорӣ, нишонаи ҳуввият ва озодӣ, ифтихор ва номус, бақои симои миллати соҳибихтиёру соҳибдавлати тоҷикон, шиносномаи миллат ва шарафу эътибори ба ҷаҳони мутамаддин пайвастани кишвари соҳибистиқлоламон мебошад”.

Дар идомаи вохӯрӣ гуфта шуд, ки дар ҷаҳони муосир рў овардан ба ҷавонон ва истифода аз имкониятҳои зеҳниву ҷисмонии онҳо яке аз шартҳои асосии ноил шудан ба инкишофи устувори давлат ва ҷомеа мебошад. Имрўз ҷавонон ҳамчун нерӯи бузурги бунёдгару созандаи мамлакат эътироф гардида, ҳалли мушкилоту масъалаҳои ҳаёти наврасону ҷавонон самти стратегӣ ва афзалиятноки сиёсати иҷтимоии давлати Тоҷикистон эълон шудааст.