МУАЛЛИФ: БЕҲРӮЗ ХОЛМУРОД

Вазири корҳои дохилии Тоҷикистон, генерал-лейтенанти милитсия Раҳимзода Рамазон бо ҷавонон мулоқот кард.

Дар чорабинӣ, ки ба ифтихори Соли ҷавонон доир гашт, курсантони Академияи Вазорати корҳои дохилӣ, афсарони Сарситоди ҳамоҳангсозии Воҳидоти таъиноти махсуси ВКД, гурӯҳи ҷавонони «Пешоҳанг» ва насли ҷавони милитсия аз дигар ҷузъу томҳои мақомоти корҳои дохилӣ ширкат варзиданд.

Раҳимзода Рамазон зикр намуд, ки 22 декабри соли 2016 Пешвои миллат дар Паёми навбатии худ қайд карданд, ки кишвари мо ба марҳалаи нави рушд ворид гардида, мардуми Тоҷикистон ба сӯйи ояндаи дурахшон бо қадамҳои устувор пеш меравад. Боиси сарфарозист, ки дар Паём соли 2017 Соли ҷавонон эълон шуд ва Президенти кишвар таъкид карданд, ки ҷавонон бояд ояндасози кишвар бошанд. Ин нукта шумо - ҷавононро водор месозад, ки руҳбаланд гардида, давомдиҳандаи кору фаъолияти насли калонсол, нерӯи созанда ва иқтидори пешрафти ҷомеа, ояндаи миллат ва давлат бошед.

– Имрӯзҳо дар тамоми соҳаҳои ҳаёти иқтисодӣ, иҷтимоӣ, фарҳангию маданӣ, алалхусус мақомоти ҳифзи ҳуқуқ ҷавонони бонангу номус содиқона кору фаъолият намуда, дар рушди иқтисодиёти миллӣ саҳми назаррас мегузоранд. Дар баробари ин, ҷавонони мо дар дохил ва хориҷи мамлакат дар бахшҳои гуногун таҳсил карда, соҳиби касбу ихтисосҳое шуда истодаанд, ки барои кишварамон зарур мебошад. Ҳукумати ҷумҳурӣ ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардонидани онҳо имкониятҳо фароҳам меоварад. Наврасону ҷавононро зарур аст, ки ҷавобан ба ин ғамхориҳо саъю талоши хешро ба донишандӯзӣ, интихоби касбу ҳунари муосир, ободию пешрафти сарзамини аҷдодӣ, ҳимояи Ватан ва корҳои бунёдкорӣ равона созанд”, - иброз дошт Р. Раҳимзода.



Дар идома вобаста ба гаравидани баъзе ҷавонон ба гурӯҳҳои ифротӣ изҳори нигаронӣ карда шуда, қайд гардид, ки аз тарафи мақомоти ҳифзи ҳуқуқ оид ба пешгирии гаравидани ҷавонон ба ҳизбу ҳаракатҳои террористиву экстремистӣ чораҳо андешида шудаанд. Аммо боиси таассуф аст, ки ҷавонони ноогоҳ аз тамаддуни ниёгону фарҳанги миллӣ ба доми фиреби таблиғчиён афтода, шомили гурӯҳҳои ифротӣ мешаванд. Ин қабил ҷавонон онҳое мебошанд, ки ҷаҳонбинии танг, сатҳи маърифатнокии паст дошта, аз таъриху фарҳанг ва дину оини аҷдодӣ дуранд. То имрӯз ҷавонони зиёди кишвари мо ба гурӯҳҳои ифротӣ шомил гардида, чандин нафари онҳо ҷони ҷавони худро аз даст додаанд.

Таъкид шуд, ки насли ҷавононро лозим аст, то дорои ҳисси баланди миллӣ бошанд, бо Ватан, миллат ва давлати соҳибистиқлоли худ ифтихор намуда, барои ҳимояи онҳо ҳамеша омода ва ҳушёру зирак бошанд.