ҶАВОНОН
Ҷумъа 24 Май 2019 06:39
5438
Оё Шумо боре дидаед, ки зиндагии касе бидуни пойафзол гузашта бошад?

Оё Шумо боре ба дарс, кор, бозор, вохӯрӣ... бе пойафзол рафтаед?

Оё Шумо боре фикр кардаед, ки агар пойпӯш намебуд чӣ кор мекардед?

Оё Шумо боре андешидаед, ки наздатон хизмати якрӯзаи пойафзол чанд аст ва бароятон чӣ қадар арзиш дорад?

Оё Шумо боре хостгори аз байн пурра нест шудани пойпӯш шудаед?

Маълум аст, ки ҷавоби саволҳои боло ҳиссачаи инкории “не”-ро қабул мекунанд, пас бояд гуфт, ки дар ҳаёти инсон пойафзол яке аз муҳимтарин ашё ба шумор рафта, ҳатто аз хона берун шудан ҳам вобаста ба он аст.

Пӯшида нест, ки мо дар ҷумҳурӣ таъмиркунандаи хеле зиёд дорем, вале мутаассифона сафи онҳое, ки ба истеҳсоли пойпӯш машғуланд, ниҳоят кам аст. Ин дар ҳолест, ки ҷумҳурии мо дорои захираи бойи маҳсулоти хом (чарм) буда, барои равнақу ривоҷ додани ин касб пурра мусоидат мекунад.

Мо доир ба аҳамияти истеҳсоли пойафзол дар Тоҷикистон, паҳлуҳои мусбат ва манфии касби пойафзолдӯзӣ, камбудӣ ва норасоиҳои ҷойдошта, даромад ва эътимоди мардум ба ин касб суҳбате доштем бо Аъзам Аҳруллоев, истеҳсолкунандаи пойафзолҳои ватанӣ, роҳбари ширкати пойафзолбарории “Azam”, ки ҳоло манзури хонандаи гиромӣ мегардад.

- Салом, Аъзам!

- Алейкум салом!

- Чун хонандаи мо аз кору зиндагии Шумо бохабаранд ва медонанд, ки Аъзам пеш аз таъсиси ширкати пойафзолбарории “Azam” ба ҳайси рӯзноманигор фаъолият мекард, нахуст мегуфтед, ки чаро ва чӣ тавр самти фаъолиятатонро иваз кардед?

- Ман аз рӯйи ихтисос рӯзноманигор ҳастам. Пас аз хатми донишгоҳ хостам ба соҳибкорӣ машғул шавам. Вақте ки дар интернет як видеороликро дар бораи чӣ тавр истеҳсол кардани пойафзол дидам, дар ман хоҳиши ба ин самти фаъолият омадан зиёд шуд. Дар ин вақт ба ман хуб маълум буд, ки дар Тоҷикистони мо маҳсулоти хом (чарм) хеле фаровон аст ва метавонем ин соҳаро рушд диҳем. Дар аввал ман бисёр омӯхтам пасон корро шуруъ кардам...

- Корро чӣ тавр шуруъ кардед? Шумо бо тафсил гӯед, зеро хонандаи мо аслан довталбон ҳастанд ва ба мо муҳим аст, ки барои онҳо ҳама чиз фаҳмо бошад...

- Ман кори худро аз 250 сомонӣ оғоз карда будам. Яъне аввал ба истеҳсол нею ба фурӯши пойафзол машғул будам. Ман аз Хуҷанд пойафзол фармоиш медодам ва дар Душанбе ба фурӯш мемондам. Ҳамин тавр ҳоло ба ҷое расидем, ки коргоҳи истеҳсоли пойафзол дорем ва қариб, ки ҳама намуди пойафзолро истеҳсол мекунем.

- Бренд яъне чӣ?

- Умуман сохтани бренд маънои онро дорад, ки ба номи гузошта ва маҳсулоти истеҳсолнамудаи Шумо мардум бовар мекунанд. Шукр, ки мо бо ростгӯӣ ва мақсадҳои бузург боварӣ ва эътимоди мизоҷонамонро ба даст оварда истодаем.

- Умри “Azam” чанд аст?

- Коргоҳамон 8-сола, вале фаъолиятамро дар ин самт 3 сол мешавад.

- Аз бренди Шумо тақрибан чанд фисади аҳолии ҷумҳурӣ хабар доранд?

- Хушбахтона, имрӯз бренди моро зиёда аз 2%-и аҳолии ватанамон мешиносанд. Ин барои мо дастоварди хуб аст.

- Дастаи Шумо чанд нафарро дар бар мегирад?

- Мо дар ширкат зиёда аз 20 нафар ҳастем.

- Он 20 нафар дар ташкилот ба чӣ корҳо машғуланд?

-Мо дар назди ташкилоти пойафзолбарории “Аzam” мактаби худро дорем. Яъне мо шогирд қабул мекунем ва пас аз корро омӯхтанашон ба кор мегирем. Бояд як чизро қайд кунам, ки дар яке аз мактабҳои кишвар барои наврасони имконияташон маҳдуд ихтисоси пойафзолдӯз вуҷуд дорад ва мо пеши худ мақсад гузоштаем, ки бо он мактаб ҳамкорӣ кунем ва муҳассилини даргоҳи мазкур таҷрибаомӯзиашонро дар ташкилоти мо гузаронанд. Ва боз нақша дорем, ки як курси омӯзишии дигар ташкил диҳем барои онҳое ки кӯҳнадӯз шуданиянд.

- Як нафаре, ки хоҳиши аз худ кардани касби пойафзолдӯзиро дорад барои ба курсҳои Шумо омадан чӣ кор бояд кунад?

- Барои дар назди ташкилоти мо омӯхтан басанда аст, ки хоҳиш дошта бошад. Ҳар шахсе, ки хоҳиш дорад ва бо мақсади муайяне меояд, дарҳои мо ҳамеша бозанд.

- Бисёр хуб, даромад чӣ хел аст?

- Бояд бигӯям, ки айни ҳол мо барои пул кор накарда истодаем. Балки дар ҳоли ҳозир фақат барои худро сохтан, мавқеъ ёфтан, сафи коргаронро зиёд кардан, ҳар он чизе ки медонем ба дигарон омӯзонидан қувваамонро сарф карда истодаем. Ин мақсади асосии мост. Мехоҳем, ки кормандони мо кореро иҷро карда тавонанд, ки ба мислашро дар Осиёи Миёна касе карда натавонад.

- Яъне ҳозир фоида нест?

- Фоида ҳаст, аммо барои шогирд тайёр кардану бисёртар таҷриба кардан онро мо харҷ мекунем. Масалан, мо як ҳамёнро месозем ва агар ба фурӯш рафт хуб, баракс шуд, барои мо таҷриба мешавад.

- “Azam” дар кадом минтақаҳои ҷумҳури намояндагиҳои худро дорад?

- Ҳоло мо танҳо дар Душанбе ҳастем. Мақсад дорем, ки шакли ҳуқуқии фаъолиятамонро иваз карда, дар ҳама гӯшаҳои Тоҷикистон намояндагиҳоямонро дошта бошем. Имсол бошад, кӯшиш мекунем, ки ҳадди ақал дар марказҳои вилоятҳоямон намояндагиҳоямонро кушоем.

- Ташаккур, Аъзам! Паҳлӯи дигари суҳбатамон, ки мақсадамон бешатр дар он зоҳир мегардад вобаста ба худи касби пойафзолистеҳсолкунию таъмир кардани он аст. Ба андешаи худи Шумо зарурати интихоби пойафзолдӯз ҳамчун касб дар чист?

- Ин яке аз касбҳоест, ки соҳибашро дар ягон кунҷи дунё гурӯсна намемонад. Вақте ки як нафар ҳуқуқшинос мешавад, ҳамин ки аз як давлат ба давлати дигар рафт бояд ихтисосу донишашро бо талаботу меъёрҳои ҳуқуқии он кишвар мутобиқ кунад, ки онро дар маҷмуъ такмили ихтисос ҳам гӯем хато намешавад, аммо пойафзолдӯзӣ ин тавр нест. Яъне ин касб дар ҳама ҷо як намуд аст. Шахсе ки ин касбро пешаи худ мекунад, ҳамеша соҳиби нон, ном ва иззат аст.

- Ин касб кадом талаботро дорад?

-Пойафзолдӯзӣ ё истеҳсоли пойафзол назди интихобкунандаи худ ягон талаботи физиологӣ надорад. Ягона чиз хоҳиш аст. Хоҳише, ки ҳамин касбро ба таври касбӣ аз худ мекунад.

- Аз дигар ҷиҳат чӣ?

- Агар пурсиданӣ бошед, ки як довталаби ин касб бояд чиҳоро бидонад, пас бояд бигӯям, ки аз оне мардум фикр мекунанд ва ё таассурот надоранд дар бораи ин касб, нафари пойафзолдӯзшаванда чандин маротиба предметҳои зиёдро донистанаш муҳим аст. Аввалан, бояд биологияро хуб донад. Сохти пойи одамро бисёр дақиқ бояд омӯзад. Ин барои чӣ даркор аст? Барои он ки агар сохти пойи одамро надонад пойафзол истеҳсол карда наметавонад. Дуюм, бояд математикаву геометрияро донад, зеро даруни пойафзолро чену чоқ кардан мебояд. Баъдан, фаҳмидани сохти чарм, истифода бурда тавонистани ҳар гуна монеаҳо, барои коркарди пойафзол...

Бояд қайд кард, ки донистани инҳо танҳо барои нафароне зарур аст, ки бевосита мехоҳанд ба истеҳсоли пойафзол машғул шаванд, на ин ки куҳнадӯзӣ мекунанд.

- Ояндаи ин касбро чӣ гуна мебинед?

- Метавонам се намуд ҷавоб диҳам. Якум, ҳамчун пойафзолдӯз: бо боварӣ гуфта метавонам, ки Худо хоҳад дар даҳ соли оянда ин касб хеле рушд мекунад. Чунки омили асосии истеҳсоли пойафзол маҳсулоти хом аст, ки мо коркарди онро ҳам ба роҳ мемонем. Дуюм, ҳамчун соҳибкор: ин намуди фаъолият хуб ва фоидаовар аст, зеро мардум ҳамеша ба пойафзол ниёз доранд. Сеюм, ҳамчун роҳбари корхона: Ширкати мо аввал дар ҷумҳурӣ ва пасон дар Осиёи Миёна дар истеҳсоли пойафзол аз ҳама пешсаф мегардад. Ин аз он аст, ки мо ба худамон бовар дорем.

Мусоҳиб:
Ҳафизуллоҳ ТОҲИРӢ, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Май 2019 c.