Дар руҳияи ватандӯстиву ватанпарварӣ тарбия намудани ҷавонон ва муқаддас донистани ҳар зарра хок ва ҳар қатра оби Ватан яке аз вазифаҳои муҳимтарини ҷомеа ба шумор меравад. Ҷавонон насли ояндасозу бунёдкори ҷомеа ва неруи бузурганд, хосса дар ҷумҳурии мо, ки қисми зиёди аҳолиашро ҷавонон ташкил мекунанд.

Капитани гвардия Расулзода Абдулвосит аз хурдӣ орзуи корманди низомӣ буданро дар дил мепарварид. Ҳамеша ба ашхоси низомӣ, сару либос, тарзи роҳ рафтан, муомилаву рафтори онҳо бо ҳавас менигарист.

- Ростӣ, ҳаргиз бовар надоштам, ки замоне мерасаду ман низ либоси низомиро ба бар намуда, ба мардуми сарбаланди кишварам хизмат мекунам. Вақте вориди муҳити низомиён гардидам, як дунёи пурасрореро барои худ кашф намудам. Он кӯраи азимеро мемонад, ки одамон дар он чун оҳан болои оташ гудохта мешаванд, пухта мешаванд, қадршиносу заршинос мешаванд, аз заъфият дур шудаву одамият меомӯзанд, кинаварзиро фаромӯш намудаву инсондӯст мешаванд, аз вобастагӣ раҳо шудаву мустақил мешаванд, бо пару боли хеш парвоз карданро меомӯзанд. Нотарс, ҷасур далер ва пурқувват мешаванд. Дар умум рушд меёбанду ба камоли инсонӣ мерасанд, – гуфт ин ҷавонӣ низомӣ.

Абдулвосит баъди хатми донишгоҳ бо ихтисоси таърих – архившиносӣ дар филиали Бойгонии марказии давлатии Ҷумҳурии Тоҷикистон дар шаҳри Ҳисор ба кор шуруъ намуда, баъдан фаъолияташро дар Бойгонии марказии давлатии Ҷумҳурии Тоҷикистон ҳамчун бойгоншиноси пешбар идома дод.

Ӯ касбашро бисёр дӯст медорад. Аз ин лиҳоз, назди худ ва наздиконаш мақсад гузоштааст, ки бояд дар азмаш устувор бошад. Нозукиҳои пешаашро омӯзад. Ба рафъи тамоми мушкилиҳо омода гардад. Ба ин бовар аст, ки иродаи устувор ва меҳнати пайваста касро дар ҳама кор муваффақ мегардонад. Ин аст, ки бо масъулияти баланд аз соли 2011 то имрӯз дар ин коргоҳи заҳматталаб фаъолият мекунад.

Хазинаи бойгонии миллӣ қисми таркибии осори таърихӣ ва фарҳангии ватанию ҷаҳонӣ, ҳамчунин захираи иттилоотии ҷомеа буда, ба таркиби он, сарфи назар аз навъ, ҷои таъсис ва шакли моликият, маҷмӯи ҳуҷҷатҳое дохил мешаванд, ки дар Ҷумҳурии Тоҷикистон ва берун аз ҳудуди он маҳфуз мебошанд ва таърихи ҳаёти маънавию модии халқҳоро инъикос намуда, арзиши илмӣ ва таърихию фарҳангӣ доранд.

Расулзода Абдулвосит аз соли 2017 фаъолияти худро дар Гвардияи миллии Ҷумҳурии Тоҷикистон оғоз намуда, барои нишондиҳандаҳои беҳтар касб намудан дар кори бойгонӣ ҳамарӯза заҳмат мекашад. Ӯ имрӯз сардори Бойгонии марказии Раёсати корҳои Фармондеҳии Гвардияи миллии Ҷумҳурии Тоҷикистон мебошад.

Ин ҷавон имрӯз масъулияти хеле калонро ба уҳда дошта, ягон лаҳза фориғ аз кор нест. Вақте бори нахуст либоси низомӣ ба бар намудаву ваъда дод, ки кори бойгониро фаъол мекунад, бо қувваи дучанд фаъолиятро оғоз намуд. Бо мурури замон нишон дод, ки азму иродааш қавӣ аст, дарҳол гумону шубҳаро аз қалб дур афканда, дар назди ҳозирин бо суханони “Ба Ватан содиқона хизмат мекунам!” бо ифтихор савганди садоқат ба Ватану миллатро ба забон овард.

- Як нуктаи муҳимро бояд қайд кард, ки дар баробари дигар бойгониҳои ҷумҳуриявӣ Бойгонии марказии Раёсати корҳои фармондеҳӣ низ дорои ҳуҷҷатҳои боарзиши таърихии миллат аст. Аз рўзҳои нахустини таъсисёбии Гвардияи миллӣ ҳуҷҷатҳои хеле арзишноке тавлид ёфтанд, ки имрӯз таърихи ин ниҳоди кишварро возеҳу равшан месозанд, - иброз намуд ин ҷавони қавиирода. - Ман аз рӯзе, ки дар ҷомеа худро шинохтам, дар муҳити бойгонишиносӣ ба воя расидам, чун бобоям ва падарам дар ин соҳа тамоми умр кор карда, дар зинда нигоҳ доштани таърихи миллат саҳм гузоштаанд.

Ба гуфтаи ӯ, дар аввал кор каме мушкил буд. Ӯ ҳама корҳои марбут ба соҳа, аз ҷумла, омодасозии феҳрасти ҳуҷҷатҳо, ташкил ва аз нав намудани рафҳои бойгонӣ барои нигоҳдории ҳуҷҷатҳо, тартиби дурус-ти нигоҳдорӣ ва ҷобаҷогузории ҳуҷҷатҳо дар рафҳо, ташкили курсҳои коргузории бойгонидориро дар Саридораи бойгонӣ ва Бойгонии давлатии вилояти Суғд бо сомон расондааст.

Ӯ ҳамеша орзу дошт, ки фаъолияти бойгониро дар Гвардияи миллии Ҷумҳурии Тоҷикистон зинда кунад. Бо талошҳои зиёд ва дастгирии ҳамкорон ӯ ба орзуи худ расид.

Ӯ мегӯяд, “Модар – Ватан бо ҳазорон орзую умед шахсро ба воя мерасонад, ки ҳангоми таҳдиди хатаре, пеш омадани бадбахтие аз як гиребон сар бароварда, бо дилу ҷон ва бо тамоми вуҷудамон онро ҳифз кунем, нагузорем, ки душман қадами номубораки хешро ба ин хоки муқаддас гузорад. Дар ин роҳ агар зарур ояд, ҷон супорем”.

Ифтихорманд аз Президенти кишвар муҳтарам Эмомалӣ Раҳмон аст, ҳамеша дастуру супоришҳои ин марди хирадро сармашқи кори худ намуда, барои иҷрои он талош меварзад.

-Суханҳои меҳрбори Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба ифтихори 25-солагии таъсисёбии Гвардияи миллӣ боз моро водор намуд, ки доимо дар ифои вазифа содиқ бошем. Президенти кишвар муҳтарам Эмомалӣ Раҳмон қайд карданд, ки “Имрӯз Гвардияи миллӣ, ки мо онро ҳамчун рамзи давлатдории миллӣ бо дарназардошти нишонаҳои таърихии ниёгонамон амалан дар ҷойи холӣ созмон додем, ба сохтори муташаккил ва муназзам табдил ёфтааст ва вазифаҳои пуршарафу масъулиятноки ҳифзи манфиатҳои Ватанро сарбаландона иҷро карда истодааст.” Мо низ ин суханони Сарвари давлатро дастгирӣ намуда, кӯшиш менамоем, ки ҳамқадами замон бошем, - бо хушнудӣ мегӯяд Абдувосит.

Ин ҷавони қавиирода ният дорад, ки то рутбаи генералӣ дар Гвардияи миллии Ҷумҳурии Тоҷикистон хизмат намояд. Аз ин рӯ, ӯ ҳамеша барои пешравии соҳаи интихобкардааш дар талош аст. Итминони комил дорад, ки азми дурусту саъйи комил касро ба ҳама орзуву ниятҳо мерасонад.

Капитан Абдувосит Расулзода аз минбари рӯзномаи “Ҷавонони Тоҷикистон” ба кулли ҷавонони кишвар муроҷиат намуда, мегӯяд, ки “ҳар як ҷавони ин Ватан бояд пеш аз ҳама хизмати Модар-Ватанро адо намояд, чунки хизмат ба Ватан ҳам қарзу ҳам номуси ҷавонмардист”.