Дар Филармонияи давлатии Тоҷикистон ба номи Акашариф Ҷӯраев маъракаи тантанавии гусели наваскарон ба сафи Қувваҳои мусаллаҳи мамлакат баргузор гардид.

Дар маросими гусели наваскарон муовини Вазири мудофиаи Ҷумҳурии Тоҷикистон Асрор Латифзода, муовини якуми раиси Кумитаи ҷавонон ва варзиши назди Ҳукумати Ҷумҳурии Тоҷикистон Ризо Назарзода, раисони чор ноҳияи шаҳри Душанбе- Исмоили Сомонӣ, Шоҳмансур, Сино ва Фирдавсӣ, масъулини сохторҳои марбутаи мақомоти иҷроияи ҳокимияти давлатии шаҳр, роҳбарони комиссариатҳо ва қисмҳои ҳарбӣ, падарону модарони навдаъватшудагон иштирок доштанд.

Зикр гардид, ки хизмати Ватан-модар қарзи фарзандии ҳар як ҷавонмард ба ҳисоб меравад. Сол то сол сафи ҷавононе, ки ихтиёран ба сафи Қувваҳои мусаллаҳ мепайванданд, зиёд гардида истодааст. Ҳукумати мамлакат ҷиҳати боз ҳам рушд додан ва фароҳам сохтани шароити созгор барои сарбозону афсарони шуҷои Ватан пайваста тадбирҳои мақсаднок меандешад.

Ҳамасола моҳи октябр даъвати тирамоҳӣ шуруъ мегардад ва он то охири моҳи ноябр идома меёбад. 

Дар интиҳои ҳамоиш аз ҷониби дастаҳои ҳунарӣ барномаи консертӣ пешниҳоди иштирокчиён гардонида шуд.

Чун анъана аз ҷониби муҳассилини муассисаҳои таҳсилоти ҳамагонии шаҳр дар назди меҳмонону навдаъватшудагон маросими "Нонгазон" сурат гирифт.