Субҳи 18-уми март, саҳни Кумитаи кор бо ҷавонон ва варзиши назди Ҳукумати Ҷумҳурии Тоҷикистон қабои идона дошт. Духтарон чун гулҳои наврустаи баҳорӣ ба тан либосҳои шинаму зебои хоси тоҷикона шукуфта буданд. Ҳама азми сафар доштанд. Дар Ҳисори Шодмон бояд Наврӯзи байналмилалиро Кумитаи кор бо ҷавонон ва варзиш дар якҷоягӣ бо мақомоти иҷроияи ҳокимияти давлатии шаҳри Ҳисор бо сарпарастии Федератсияи футболи кишвар ҷашн мегирифт.

Соати 8:30 масъулин ва кормандони зерсохторҳои Кумита, волонтёрон ва ҷавонони фаъол роҳ сӯи Ҳисори Шодмон пеш гирифтем.

Шурӯи баҳор худ бозгӯ мекунад, ки Наврӯз аз мост ва маҳз дар Тоҷикистон пайдо шудааст. Зеро мутобиқ будани фасли сол, айёми кишту кор, зиндашавии табиат, ки Наврӯз бахшида ба ин ҳама ҷашн гирифта мешавад, маҳз дар баҳори Тоҷикистон дида мешавад.

Вақте ки мо бо гурӯҳи сафариамон ба шаҳри Ҳисор равон будем, сари ҳар қадам дарахтони гулкарда, омодагиҳои ҷашни Наврӯзӣ ва шодию сурури мардум мушоҳида мешуд.

То Ҳисор норафта, дар шафати пойтахти азизамон деҳаи Чоряккорон ҷойгир шудааст. Сарсабзии дашту даман, вазиши насими баҳорӣ, заминҳои киштшудаи сари роҳи деҳа ҳар бинандаро ба ваҷд меоварду ба худ мегуфт: “Воқеан баҳори Ватани мо фасли шодмониҳову зиндашавиҳост”.

Вақте ки мо ба макони ҷашнӣ расидем, тафовутҳои зиёд ба назар расид. Ин ҷашни Наврӯзӣ чун дигар ҷашнҳои Наврӯз бо омодагии сунъӣ ҷашн гирифта нашуд. Балки ҳама чиз табиӣ буд. Макони ҷашн дохили боғи пур аз дарахтони гулпӯш ва замини сабзазор дар ҷамоати Навободи шаҳри Ҳисор интихоб гардида буд. Моро дар ин макон дар фазои тантанавӣ бо рӯҳияи наврӯзидошта, истиқбол намуданд.

Баъди ташрифи раиси Кумитаи кор бо ҷавонон ва варзиш, раиси шаҳри Ҳисор, муовини раиси ҲХДТ, муовини раиси Кумитаи рушди сайёҳӣ чорабинӣ бахшида ба ҷашни Наврӯз оғоз гардид.

Дар аввал раиси шаҳри Ҳисор Ҷумъазода Шарифҷон, ҳозиринро хуш омадед ва ба ҷашни Наврӯз шодбош гуфта, аз ҳамкориҳо ва иқдомҳои наҷиби роҳбарияти Кумитаи кор бо ҷавонон ва варзиш ёдовар шуд.

Сипас, раиси Кумитаи кор бо ҷавонон ва варзиш Аҳтам Абдуллозода ҳозирин ва дар симои онҳо тамоми мардуми шаҳри Ҳисорро ба ҷашни байналмилалии Наврӯз табрик намуда, изҳор намуд: “Маҳз бо талоши пайвастаи Пешвои муаззами миллат муҳтарам Эмомалӣ Раҳмон ҷашни Наврӯз мақоми байналмилалӣ касб намуд. Боиси фахри ҳар як тоҷикистонист, ки имрӯзҳо Наврӯзро дар тамоми дунё ҷашн гирифта, аз он як ҷашни баҳамоӣ, сулҳу оштӣ, рафоқату ҳамдигарфаҳмӣ ёд мекунанд. Дар замоне, ки ҳар лаҳза як хатар эҷод мешавад, будани як ҷашне чун Наврӯз барои тамоми миллату халқҳо басо муҳим аст”.

Баъди баромади пурмуҳтавои раиси Кумита, ки дар қисмати аввали ҷашнвора буд, ровиёни маҳфил ба саҳна баромада, қисмати дуввуми чорабиниро оғоз бахшиданд. Дар қисмати мазкур, ки бештар хусусияти фароғатӣ дошт, ҳунармандони саршиноси кишвар, аз ҷумла Қобилҷон Зарипов, Хосияти Зарафшонӣ, Шуҳрат Сайнаков, Фахриддини Малик ва дигарон бо сурудҳои наврӯзӣ ва баҳорӣ табъи ҳозиринро болида гардониданд.

Бо як ҷаҳон шодиву фараҳ ҳамаи иштирокчиёни чорабинӣ ба пойтахт баргаштанд.

Хуршед МАВЛОНОВ, “ҶТ”

Душанбе-Ҳисор-Душанбе