ҶАВОНОН
Ҷумъа 20 Сентябр 2019 09:38
3594
18 октябр дар ҳошияи баргузории Фестивали ҷаҳонии ҷавонону донишҷӯён, ки дар шаҳри Сочии Федератсияи Русия ҳафтаи дуюм аст ҷараён дорад, мулоқоти ҷавонон дар доираи давлатҳои аъзои Иттиҳоди Давлатҳои Мустақил баргузор гардид.

Дар он намояндагони ҷавонони Федератсияи Русия, ҷумҳуриҳои Белорус, Қазоқистон, Туркманистон, Тоҷикистон, Озарбойҷон ва Қирғизистон иштирок намуданд. Ҷониби кишвари моро намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва волонтёрон муаррифӣ карданд.

Дар мулоқоти мазкур масъалаҳои марбут ба татбиқи сиёсати давлатии ҷавонон дар кишварҳои аъзои ИДМ, рушди маърифати ҳуқуқиву сиёсии ҷавонон ва дастгирии соҳибкорони ҷавон мавриди баррасӣ қарор дода шуданд.

Умед Раҳимов, муовини озоди раиси Иттифоқи ҷавонони Тоҷикистон, зимни суханронӣ роҷеъ ба татбиқи сиёсати давлатии ҷавонон дар Тоҷикистон изҳор дошт, ки “яке аз самтҳои афзалиятноки сиёсати давлатии ҷавонон дар давлати мо ин дуруст тарбия намудани насли наврас мутобиқи талаботи замон мебошад, ки моҳияти миллии сиёсати давлати моро дар соҳаи кору тарбия бо ҷавонон ифода менамояд. Аз ин рӯ, бо назардошти нақши ҷавонон дар рушди ҷомеа ва ғамхории бештар нисбати ин қишри фаъол аз ҷониби Президенти кишварамон, муҳтарам Эмомалӣ Раҳмон соли 2017 дар Ҷумҳурии Тоҷикистони “Соли ҷавонон” эълон гардид ва мо пайваста кӯшиш менамоем, ки шароиту имконоти беҳтарро барои ҷавонони кишварамон фароҳам оварем”.

Ҳамчунин, зимни мулоқот ба масъалаҳои пешгирии шомилшавии ҷавонон ба ҳизбу ҳаракатҳои номатлуби ҷаҳонӣ, қочоқи маводи мухаддир миёни ин насл ва дигар ҷиноятҳои муташаккили фаромилӣ таваҷҷуҳ зоҳир гардид. Зикр шуд, ки ҷавонон бояд бо корҳои манфиатовар ба худ ва ҷомеа машғул шаванд, худро аз ҳар гуна хавфҳои хатарноки ҷаҳонӣ эмин нигоҳ дошта, дар пешравии кишварҳои хеш саҳмгузорӣ намоянд. Дар ин самт ҳозирин ҳамчунин ба масъалаи рушди фаъолияти волонтёрӣ дар кишварҳои худ таваҷҷуҳи махсус зоҳир карданд. “Мактаби волонтёрӣ бояд ба муҳаррики самтбахши ҷавонон табдил дода шавад. Волонтёрони кишварҳои мо дар пешбурди сиёсати давлат саҳми назаррас доранд, аммо дар роҳи пешгирии ҷинояту ҷинояткорӣ саҳлангориҳо дида мешаванд. Албатта, дар ин роҳ мо – масъулин бояд бештар корҳоро барем, то волонтёрон омӯзанд ва нотарсона гузоштани саҳми худро дареғ надоранд”,-изҳор дошт Виктор Глушин, намояндаи давлати Беларус.

Дар интиҳои мулоқот изҳори боварӣ карда шуд, ки дар самти амалишавии ҳадафу мақсадҳои гузошташуда кишварҳо метавонанд, муваффақ гарданд.

Бояд тазаккур дод, ки мулоқоти намояндагони ҷавонони давлатҳои аъзои Иттиҳоди Давлатҳои Мустақил дар ҳошияи Фестивали умумиҷаҳонӣ бо пешниҳоди Тоҷикистон ташкил ва баргузор карда шуд.

Ёдовар мешавем, ки муддати 2 ҳафта аст, ки дар шаҳри Сочии Русия Фестивали ҷаҳонии ҷавонону донишҷӯён идома дорад.

Амир УРУНОВ, шаҳри Сочӣ

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.