Ба ифтихори “Соли ҷавонон” дар мавзеи Даштӣ ҷамоати деҳоти Мирсаид Миршакари ноҳияи Роштқалъа боғи нав бо номи “Боғи ҷавонон” бунёд гардид, ки дар майдони 1,5 гектари он беш аз 2 000 бех дарахтони мевадиҳанда шинонда шуд.

Тавре Зӯҳро Муллоҳикматова, мудири Бахши ҷавонон, варзиш ва сайёҳии ноҳияи Роштқалъа иттилоъ дод, боғи мазкур бо ташаббуси Бахши ҷавонон варзиш ва сайёҳӣ дар ҳамкорӣ бо Мақомоти иҷроияи маҳаллии ҳокимияти давлатии ноҳия бунёд гардида, дар маъракаи ниҳолшинонии он зиёда аз 1500 нафар сокини ноҳия ширкат доштанд, ки аз онҳо 500 нафар ҷавонон буданд.

Мувофиқи тавзеҳоти мавсуф “Боғи ҷавонон” дар як мавзеи хушбоду ҳавои ҷамоати М. Миршакар бунёд гардида, дар он ғайр аз дарахтони себ, зардолу, гелос, олу, нок, чормағз ҳамчунин дарахтони сояафкану ороишӣ низ шинонда шудааст: “Масоҳати ин боғ дар оянда васеътар хоҳад гашт ва ниҳоли дарахтони мевадиҳандаи он ба содирот нигаронида, парвариш меёбанд. Даромад аз фурӯши ин гуна меваҷот барои беҳдошти сатҳи иқтисодию иҷтимоии мардуми ноҳия равона мегардад”,- гуфт Зӯҳро Муллоҳикматова.

Машҳур ИМОМНАЗАРОВ, “ҶТ”