Бахшида ба таҷлили Рӯзи ҷавонони Тоҷикистон, ки ҳар сол санаи 23 май қайд карда мешавад, бо қарори раиси шаҳри Душанбе Рустами Эмомалӣ  нақшаи чорабиниҳои мақомоти иҷроияи ҳокимияти давлатии шаҳри Душанбе тасдиқ шуд.

Дар доираи нақша-чорабиниҳои мазкур дар пойтахт  баргузории ҳар гуна барномаҳои фарҳангию фароғатӣ, маърифатӣ, конфронсу форум ва дигар мулоқоту суҳбатҳо бо иштироки наврасону ҷавонон пешбинӣ гардидааст. Ҳамчунин дар ин рӯз дар маконҳои фарҳангии пойтахт, аз ҷумла, боғҳои фарҳангиву фароғатии шаҳр баҳри сайругашти идонаи сокинон ва меҳмонони пойтахт  шароити мусоид фароҳам оварда  мешавад.

Бино ба иттилои Раёсати иттилоот ва робитаҳои хориҷии дастгоҳи раиси шаҳри Душанбе нақшаи чорабиниҳои мазкур бо мақсади татбиқи босамари сиёсати давлатии ҷавонон, мусоидат ба раванди тарбияи ватанпарастӣ, дар сатҳи баланди фарҳангӣ ва эҷодиву маърифатӣ таҷлил намудани Рӯзи ҷавонони Тоҷикистон  дар шаҳри Душанбе  таҳия шудааст.