Дақиқ аст, ки дар ҳама давру замон донистани забони модарӣ барои мо вазифаи аввалиндараҷа мебошад. Онро бояд ҳар шаҳрванди кишвар бо тамоми нозукиҳояш аз худ намояд. Чунки донистани забони модарӣ меъёри асосии худшносии миллӣ ба шумор меравад. Аммо барои он ки мо худро дар як ҷо маҳдуд накунему ба хориҷи кишвар  равем, берун аз Тоҷикистон корҳои илмию тадқиқотӣ анҷом диҳем, тиҷорати худро берун аз кишвар ба роҳ монем, фаротар аз ин фарҳанги худро ба дигар халқу миллатҳо муаррифӣ намоем, моро зарур аст, ки ҳатман забонҳое, ки ҳоло ҷаҳониён мушоират мекунанд, омӯзем.

Хушбахтона баъд аз ба даст овардани истиқлолият дар кишвари мо ҷиҳати омӯзиши забонҳои хориҷӣ ва азхудкунии онҳо диққати махсус равона шуда, барои омӯзандагон шароити хуб фароҳам оварда шудааст. Дар замони ҷаҳонишавӣ омӯзиш ва азхудкунии яке аз забонҳои хориҷӣ аз масъалаҳои мубрами рӯз ба шумор меравад. Ҳамин аст, ки чанд соли охир таваҷҷуҳи ҷавонон ба омӯхтани забонҳои хориҷӣ афзудааст. Дар донишгоҳу донишакадаҳо, литсейю муассисаҳои касбӣ ва мактабҳои миёнаи кишвар имрӯзҳо забонҳои зиёд, аз қабили забонҳои рӯсӣ, англисӣ, франсузӣ, арабӣ, чинӣ, олмонӣ ва ғайра таълим дода мешаванд. Аз ин миён омӯзиши забони англисӣ аҳамияти махсус дорад. Зеро ин забон яке аз забонҳои сергӯиштарин маҳсуб меёбад. Хушбахтона, имрӯз омӯзиши забони англисӣ дар Тоҷикистон босуръат пеш рафта истодааст, ба вижа дар чанд соли охир он дар кишвари азизамон вусъати тоза пайдо кардааст.

Методҳои педагогии нав аз мо талаб мекунад, ки барои ҳарчи зудтар аз худ намудани забони англисӣ дар рафти омӯзиш аз технологияҳои информатсионӣ аз қабили, проектор, тахтаи электронӣ, воситаҳои ахбори матнии электронӣ, тасвирҳои аудиовидеоӣ, тасвирҳои графикӣ ва ғайра ба таври васеъ истифода барем. Ҳамин аст, ки солҳои охир дар масъалаи истифодаи технологияҳои информатсионӣ дар соҳаи маориф ва муассисаҳои таълимӣ аҳамияти хоса дода мешавад. Истифодаи технологияҳои навин имкони бо методҳои муосир гузаронидани дарсҳоро бештар фароҳам меоварад. Шунидани ахбори аудиоӣ ё тамошои видеофайлҳо ба хонандагону донишҷӯён барои зудтару васеътар омӯхтани забони хориҷӣ мадад мерасонад. Албатта ин равандро ман ҳамчун омӯзгори забони хориҷӣ дар рафти дарс бараъло мушоҳида кардаам.

Бешак, заминаи ҳамаи донишҳо аз мактаби миёна сарчашма мегиранд. Бо дастгии Ҳукумати шаҳри Душанбе ва Раёсати маориф ҷиҳати дар сатҳи баланд гузаронидани дарсҳои забони хориҷӣ, махсусан забони англисӣ мактаби мо бо синфҳои лингофонӣ муҷҷаҳаз гардонида шудаанд. Дақиқ гардид, ки омӯзиши забонҳои хориҷӣ ба воситаи компютер, тасвирҳои графикӣ, видеофайлҳои омӯзишӣ, аудиофайлҳо, китобҳои электронӣ ва ғайра имкон медиҳад, ки хондагон дар муддати кӯтоҳ ҷиҳатҳои нозуки забонро аз худ кунанд. Натиҷаи ҳамин буд, ки соли 2013 бо истифода аз имкониятҳои мавҷуда ва тадриси сатҳи баланд хонандаи мактаби мо Рамзия Одинаева дар озмуни сатҳи ҷумҳуриявӣ аз забони англисӣ сазовори ҷои аввал гардид. Ҳоло шароити хуби дарсӣ ба мо имкон додааст, ки ба шогирдон бо усулҳои замонавӣ ва нисабатан осон дар камтарин вақт забони англисиро омӯзонем.

Пушида нест, ки таваҷҷуҳи Пешвои миллат, Президенти ҷумҳурӣ, муҳтарам Эмомалӣ Раҳмон барои азхудкунии забонҳои хориҷӣ миёни ҷавонон бисёр назаррас аст. Ҳамин аст, ки Президенти маҳбубамон зимни ҳар вохӯрӣ бо ҷавонон таъкид мекунанд, ки ҷавонон бояд ҳатман донандаи хуби забонҳои хориҷӣ бошанду аққалан ду забони хориҷиро донанд.

Соли ҷавонон эълон гардидани соли 2017 ба мо боз ҳам имкон медиҳад, ки дар ҷодаи забономӯзӣ саъю талоши бештар варзему забондонии худро вусъат бахшем.

Бо истифода аз имкониятҳои мавҷуда дар Соли ҷавонон саъй менамоем, ки барои боз ҳам хубтар омӯзонидани забони англисӣ ба хонандаҳо аз усулҳои замонавӣ кор бигирем. Пешниҳод менамоям, ки дар соли ҷорӣ барои боз ҳам ҳавасманд гардонидани ҷавонон баҳри азхудкунии забонҳои хориҷӣ аз рӯи номинатсияҳои гуногун мусобиқаҳо багузор гардад. Масалан, аввал як мактаб дар доираи хонандаҳои худ тарҷумони беҳтарин, луғатдони беҳтарин ва ровии беҳтаринро муайян намояд. Ба ҳамин минвол дар мактабҳои ноҳияву шаҳрҳо, вилоятҳо ва ахиран дар сатҳи ҷумҳурӣ озмун баргузор шавад. Аз рӯи се номинатсияи зикршуда ғолибон эълон гарданду бо тӯҳфаҳои арзанда сарфароз гарданд. Боварӣ дорам, ки он барои боз ҳам оммавӣ гардидани омӯзиши забонҳои хориҷӣ мусоидат менамояд.

Озода ЮЛДОШЕВА,
омӯзгори МТМУ №24-и шаҳри Душанбе