МУАЛЛИФ: ШЕРАЛӢ АЗИМӢ

Бо ташаббуси Кумитаи ҷавонон, варзиш ва сайёҳӣ дар Донишгоҳи давлатии Кӯрғонтеппа ба номи Носири Хусрав дар мавзӯи «Ҳувияти миллӣ ва давлати дунявӣ дар мисоли фарҳанг ва маорифи динӣ» семинар – машварат баргузор шуд.

Дар кори семинар зиёда аз 50 нафар олимону муҳаққиқони ҷавон ва донишҷӯён иштирок намуданд.

Давлат Суфизода - мутахассиси пешбари Раёсати кор бо ҷавонони Кумитаи ҷавонон, варзиш ва сайёҳӣ ба сухан баромада, иштирокчиёнро ба муносибати Соли ҷавонон эълон гардидани соли 2017 табрику таҳният гуфт. Қайд намуд, ки КҶВС бо мақсади рафти иҷрои дастуру супоришҳои Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон вобаста ба тарбияи насли ҷавон дар роҳи худшиносӣ, ватандӯстӣ, эҳтирому арҷгузорӣ ба муқаддасоти давлатию арзишҳои волои миллӣ, дарки мафҳуми давлати дунявӣ дар мисоли фарҳанг ва маорифи динӣ чораҳои зарурӣ роҳандозӣ намуда, чорабиниҳои муҳимро бобати ифтихор доштани ҷавонон бо фарҳанг, тамаддун, миллат, давлату давлатдорӣ, садоқат ба Ватан, пос доштани обу хоки кишвар, ҳифзи ҳар як порча замини он, таҳсилот дар муассисаҳои бонуфузи мамлакат ва озодии динӣ, баҳри тарғибу ташвиқи фарҳанги миллӣ ва роҳ надодан ба фарҳанги бегона ташкил ва баргузор менамояд.

- Зери мафҳуми ҳувияти миллӣ мо дарки ҳастӣ, сарҷамъӣ, иттифоқӣ, ифтихормандӣ аз миллату давлат, шарафмандӣ ва Ваҳдати миллиро таҷассум намуда, дар мафҳуми давлати дунявӣ озодии дину суханро дар дахлнопазирии ташкилотҳои динӣ ба давлат дар мисоли фарҳанг ва маорифи динӣ шарҳ медиҳем, – афзуд Д. Сӯфизода.

Ҳамчунин, Аҳлиддин Саидмуминов - раиси Шӯрои олимон ва муҳаққиқони ҷавон ва дигарон ба сухан баромада, доир ба мазӯъ фикру андешаҳои хешро иброз намуданд.