Дар Амфитеатри Боғи фарҳангию фароғатии ба номи Абулқосим Фирдавсии шаҳри Душанбе, санаи 14 май, зери унвони "Дӯстии ҷавонони ҷаҳон поянда бод!" нахустин Фестивали фарҳангии донишҷӯёни хориҷие, ки дар Ҷумҳурии Тоҷикистон таҳсил доранд, баргузор гардид.
 
Фестивали мазкур аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир шуда, дар он намояндагони 12 давлати дунё, аз қабили Русия, Туркменистон, Қазоқистон, Қирғизистон, Афғонистон, Ӯзбекистон, Туркия, Ҳиндустон, Чин ва Тоҷикистон иштирок намуданд.
  
Аҳтам Абдуллозода, раиси Кумитаи кор бо ҷавонон ва варзиши назди Ҳукумати кишвар, фестивалро ифтитоҳ бахшида, иброз дошт: “Мо дар моҳвораи ҷавонон қарор дорем ва ҷавонон ҳамчун ояндасозони ин давлату миллат зери таваҷҷуҳи бевоситаи Пешвои муаззами миллат қарор доранд ва баҳри рушду такомули дониш, меҳнату таҳсил ва ба ҳаёти шоиста ҷалб гардиданашон аз ҷониби Ҳукумати Ҷумҳурии Тоҷикистон тамоми заминаҳои зарурӣ ва шароитҳои мусоид фароҳам оварда шудааст. Қуллаи баландтарини моҳвораи ҷавонон рӯзи 23-юми май аст, ки онро ҳамчун Рӯзи ҷавонон мо якҷо бо кулли ҷавонони кишвар ва ҷавонони хориҷи кишвар, ки дар ҷумҳурии мо таҳсил менамоянду умр ба сар мебаранд, бо шукуҳу шаҳомати хосса таҷлил менамоем”.
 
Пас аз суханони табрикотӣ раиси Кумита ба иштирокчиёни фестивал сипосномаи Кумитаи кор бо ҷавонон ва варзишро барои доштани завқи баланди фарҳангӣ, бедорсозии ҳисси ватандӯстиву худшиносии миллӣ дар ниҳоди насли ҷавон ва иштироки фаъолона дар аввалин Фестивали фарҳангии донишҷӯёни хориҷӣ дар Ҷумҳурии Тоҷикистон таҳти унвони “Дӯстии ҷавонони ҷаҳон поянда бод!” бахшида ба Рӯзи ҷавонони Тоҷикистон тақдим намуданд.

Дар фестивал ҷавонони давлатҳои хориҷӣ бо рақсу сурудҳои миллию хориҷӣ ҳунари волои хешро муаррифӣ намуданд. Хурсандиовараш ин буд, ки ҷавонони хориҷӣ бо либосҳои миллии тоҷикӣ баромад менамуданду бо забони тоҷикӣ суруд месароиданд.

Миёни ҷавонони хориҷии иштирокчии фестивал Улуғбек Чориев ва Аҳрор Комилов аз Ҷумҳурии Ӯзбекистон, донишҷӯёни соли аввали Донишгоҳи давлатии тиббии Тоҷикистон ба номи Абӯалӣ ибни Сино низ қарор доштанду аз он хушнуд буданд, ки дар фазои орому осудаи ду давлати ба ҳам  дӯсту бародар, Тоҷикистону Ӯзбекистон имрӯз ҷиҳати илмомӯзӣ ба кишвари мо омадаанд. Зимни суҳбат иброз доштанд: “Ба Тоҷикистон омадану таҳсил намудан дар яке аз донишгоҳҳои бонуфуз боиси фахри мост. Имрӯз дар ихтисоси “Кори табобатӣ” таҳсил дорем ва раванди илмомӯзиямон хеле хуб аст. Бо ҷавонони тоҷик дӯстӣ дорем. Ҷавонони Тоҷикистон бояд ҳамеша дар талоши илм бошанд. Зеро имрӯз кулли имконот муҳайёт. Баргузории чунин фестивал, ки кулли ҷавонони хориҷи дар Тоҷикистон таҳсилкунандаро вирди ҳам овард, моро хеле хушнуд кард”.

Сулаймон Маҳрамӣ, донишҷӯи соли дуюми факултети фалсафаи Донишгоҳи миллии Тоҷикистон аз Ҷумҳурии исломии Афғонистон, иштирокчии дигари фестивал аз таҳсилаш дар Тоҷикистон ифтихор дорад. Ӯ гуфт: “Ба ҳайси як ҷавони хориҷӣ дар Тоҷикистон ифтихор мекунам, ки дар ин ҷо пайи омӯхтани илм ҳастам. Мардуми тоҷик бисёр меҳмоннавозанд. Айни ҳол бо чандин ҷавони тоҷик дӯстӣ дорам ва ин лаҳзаҳои қиммати умри ҷавониро, ки якҷо бо ҷавонони тоҷик ба илмомӯзӣ машғулам, ҳеҷ гоҳ фаромуш нахоҳам кард. Имрӯз таҳсил дар донишгоҳ хуб аст. Агар шахс дониш омӯхтан хоҳад, имрӯз кулли имконоти илмомӯзӣ муҳаёст. Ҷавонони тоҷик аз ин ҳама муҳити хубе, ки ҷиҳати илмомӯзӣ Ҳукумати Ҷумҳурии Тоҷикистон фароҳам овардааст, бояд ба маврид истифода намоянд, мутахассис шаванд ва бо донишу малакаи хеш саҳми хешро дар пешрафти давлату миллаташон гузоранд”.

“Аз он хушнудем, ки фестивал мо-ҷавонони хориҷи кишварро ба ҳам овард, - афзуд Айғануш Аслбекова, донишҷӯ аз Ҷумҳурии Қирғизистон. – Соли дуввум аст, ки дар Донишгоҳи давлатии тиббии Тоҷикистон ба номи Абӯалӣ ибни Сино таҳсил дорам. Таҳсиламон дар сатҳи олист. Дар баробари илм омӯхтанам дар Тоҷикистон, инчунин яке аз дастовардҳоям ин омӯхтани забони тоҷикӣ мебошад. Бо кӯмаки ҳамсабақони тоҷикам, ки бо ҳам дӯстӣ дорем, забони ноби тоҷикиро омӯхтам ва баъзан бо тоҷикӣ сухан мегӯям. Дар Тоҷикистон беҳтарин фазои илмомӯзист. Барои соҳиби илму дониш шудан, танҳо мебояд омӯхт”.

Воқеан, фестивали мазкур фазои хуби дӯстиро ба вуҷуд оварда, аз баргузории он иштирокчиён хушнуд буданд.
 
Иқдоми мазкур дар доираи сиёсати ҷавонпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон роҳандозӣ шуда, дар он ҷавонони Тоҷикистон низ бо беҳтарин рақсу таронаҳои дилнишин фарҳанги волои миллати тоҷикро ба хориҷиён муаррифӣ намуданд.
 
Ба таъкиди масъулин баргузории фестивал барои табодули таҷрибаи ҷавонон дар самти фарҳангдӯстӣ, омӯзиши фарҳангҳои халқиятҳои дигар, дӯстиву ҳамгироӣ ва пеш аз ҳама барои муттаҳид намудани ҷавонон заминаи мусоид фароҳам оварда, ҳадаф аз он дӯсту муттаҳид гардонидани ҷавонони олам мебошад.