Имрӯз зери унвони мазкур дар Спорт-бари “Истиқлол” воқеъ дар шаҳри Душанбе форуми соҳибкорӣ баргузор гардид.
 
Форуми мазкур аз ҷониби  Кумитаи кор бо ҷавонон ва варзиш дар ҳамкорӣ бо Кумитаи давлатии сармоягузорӣ ва идораи амволи давлатӣ, Федератсияи футболи Тоҷикистон, Муассисаи давлатии “Ташаккул ва рушди соҳибкории Тоҷикистон” ва КВД “Клуби соҳибкории Тоҷикистон” доир гардида, дар он масъулини Кумитаи кор бо ҷавонон ва варзиш, соҳибкорони муваффақи ҷавон ва донишҷӯён иштироку суханронӣ намуданд.

Назарзода Ризо, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, чорабиниро ифтитоҳ бахшида, иброз дошт, ҷавонони боистеъдоду лаёқатманд мояи ифтихори миллат, нерӯи пешбарандаи ҷомеа ва иқтисодиёту иҷтимоиёти кишвари худ ба ҳисоб рафта, Пешвои миллат муҳтарам Эмомалӣ Раҳмон нисбат ба ин қишри созандаи ҷомеа дар бунёдкориву рушди мамлакат эътимоду боварӣ доранд. Аз ин рӯ, ҷавонони кишварро  мебояд бо дарки баланди масъулиятшиносӣ ва садоқати ватандорӣ дар таъмини пешрафти соҳаҳои иқтисодиёти мамлакат саҳми арзандаи худро гузоранд.

Зимни форум, иштирокчиёни дигар дар мавзуъҳои “Ташаккул ва рушди соҳибкории Тоҷикистон – майдони  нави соҳибкори дар Тоҷикистон”, “ОРЗУлаб платформаи рушди соҳибкории ҷавонон дар Тоҷикистон”, “ТИК Стартапҳо дар ҷаҳони муосир”, “Саҳми Клуби соҳибкорони ҷавон дар таҳкими сиёсати давлатии соҳибкории ҷавонон” баромад намуда, иброз доштанд, ки фаъолияти соҳибкорӣ яке аз рукнҳои асосии рушди иқтисодиёт ва воситаи баланд бардоштани  сатҳи некуаҳволии мардум ба ҳисоб рафта, баҳри самаранок ба роҳ мондани он ва баланд бардоштани донишу малакаи соҳибкорони ҷумҳурӣ, аз ҷумла соҳибкорони ҷавон аз ҷониби Ҳукумати кишвар диққати пайваста дода мешавад.

Дар фарҷом масъулини Кумитаи кор бо ҷавонон ва варзиш соҳибкорони ҷавонро ҷиҳати фаъолияти назаррас ва ташаббусҳои муфид бо сипоснома қадрдонӣ намуданд.