ҶАВОНОН
Панҷшанбе 01 Декабр 2022 07:12
3514
Эълон шудани соли 2017 “Соли ҷавонон” имконият, иқдому ташаббусҳо ва ба анҷом расонидани корҳои созандагиву бунёдкориро ба ин қишри аъзами ҷомеа бештару беҳтар гардонид. Дар ин сол аз ҷониби сохтору бахшҳои кор бо ҷавонон барои боло бардоштани ҳисси худшиносӣ, худогоҳӣ, ватандӯстии ҷавонон, хотирмону сазовор сипарӣ намудани ин соли таърихӣ корҳои назаррас анҷом дода шуда истодаанд. Аз тарафи Раёсати кор бо ҷавонон ва варзиши вилояти Суғд ташкил намудани форуми вилоятии ҷавонон таҳти унвони “Мо – ҷавонони хушбахти сарзамини биҳиштосо” барои таҳкими дӯстии байни ҷавонони шаҳру ноҳияҳо, ошноӣ пайдо намудан бо ҷойҳои таърихӣ ва баланд бардоштани ҳисси ватандӯстии ҷавонон кори бисёр арзишманд мебошад. Дар ин доира аз санаи 11 то 13 август бо роҳбарии сардори Раёсати ҷавонон ва варзиши вилояти Суғд Олимҷон Зоҳидзода мо – як гурӯҳ ҷавонони шаҳрҳои Исфара, Конибодом, Хуҷанд ва ноҳияҳои Бобоҷон Ғафуров, Деваштич, Айнӣ ба шаҳрҳои қадимаи вилоят Истаравшан ва Панҷакент сафар намудем.

Барои мо ин чорабнӣ танҳо як саёҳат набуд. Дар маҷмуъ аҳамияту натиҷаҳои форуми вилоятии ҷавонон аз нуктаҳои зерин иборат буд:

1. Меҳмоннавозӣ ва қабули гарм. Тоҷикон мардуми меҳнатдӯсту меҳмоннавоз ҳастанд, ки он аз фарҳангу тамаддуни бой доштани ин миллат сарчашма мегирад. Ин суханонро аз забони бисёр меҳмонони хориҷӣ ва сайёҳон мешунавем. Тамоми мутафаккирони миллати тоҷик дӯстиву рафоқат ва муносибати нек доштанро тарғибу талқин менамоянд, ки инсондӯстӣ дар маркази он қарор дорад. Мисоли равшани ин гуфтаҳо истиқболи гарму самимии иштирокчиёни форум бо нону намак аз даромадгоҳи шаҳри Истаравшан ва Панҷакент аз тарафи ҷавонон ва масъулини давлатӣ мебошад;

2. Таҳкими дӯстии ҷавонон. Дар доираи сафар ҷавонони синну сол ва касбу кори гуногуни шаҳру ноҳияҳо бо ҳамдигар аз наздик ошноӣ пайдо карда, риштаи дӯстӣ ва робита барқарор намуданд, ки чунин амал барои таҳкими ваҳдати миллӣ, иттиҳоду дӯстӣ кори ниҳоят муҳим ба шумор меравад;

3. Ошноӣ пайдо намудан аз мавзеъҳои таърихӣ. Тоҷикистон сарзамини қадима буда, ҷойҳои таърихии зиёд дорад. Вале то ба имрӯз аксарияти наврасону ҷавонони кишвар ҷойҳои таърихии ҷумҳуриро надидаанд ва танҳо тавассути телевизион, нақлҳо ва китобу рӯзномаҳо дар бораи онҳо маълумот доранд. Форуми мазкур имкон фароҳам овард, то ҷавонон мавзеъҳои таърихии ду шаҳри қадима Истаравшан ва Панҷакентро бо чашм бубинанд, бо қадам ҳис кунанд ва таассуроти неку хотирмон пайдо намоянд;

4. Гузаштан аз ватаншиносии китобию иттилоотӣ ба ватаншиносии ҳиссию амалӣ. Аз рӯи гуфтаи иштирокчиёни форум аксарияти ҷавонон ба шаҳри Панҷакент нахустин бор сафар менамуданд ва баъди ин дидор, сайру гашт, мулоқот бо мардум, ошноӣ бо ҷойҳои таърихӣ назару андешаи тоза ва эҳсоси дигаре оиди Ватани маҳбубуи худ пайдо намуданд;

5. Рушди туризми дохилӣ. Дар ҳақиқат, Тоҷикистон яке аз кишварҳои зебою таърихӣ буда, ҷойҳои зебову хуштабиате чун Ҳафткӯл, Искандаркӯл, Саразм, Ҳулбук, Чилучорчашма дорад, ки ҳамасола ҳазорҳо сайёҳ аз ин маконҳо дидан намуда, таасуроти неки маънавӣ пайдо менамоянд. Бо назардошти чунин имконияту шароит имрӯз вақти он расидааст, ки на танҳо инкишофи туризми беруна, ҳамзамон рушду нумӯи туризми дохила хеле муҳим мебошад. Зеро ин натанҳо роҳи ғанӣ намудани буҷа ва рушди туризми дохила, балки боло бурдани маърифати ватаншиносӣ, ошноӣ бо таърихи сарзамин, ҷойҳои қадима, аз наздик ошно шудан бо анъана, урфу одат ва расму русумҳои мардуми ҳар минтақаи кишвар низ мебошад;

6. Ватаншиносӣ ва ҷаҳоншиносӣ. Сафар кардан ба минтақаву шаҳрҳои дуру наздик аз қадим ба миллати тоҷик, ки ҳамеша дар паи ҷустуҷӯи илму маърифат ва ҷаҳоншиносӣ буд, яке аз одатҳои нек ба шумор меравад. Аксарияти мутафаккирону донишмандон аз як ҷониб аз сабаби мушкилоту монеаҳои дохилӣ ба хориҷ сафар карда бошанд, аз тарафи дигар ба кишварҳои хориҷа сафар карданро дар ҷаҳоншиносӣ, инкишофи илму дониш кори муҳим меҳисобиданд;

7. Риояи либоси миллӣ. Мувофиқи тадқиқоти сотсиологии соли 2015 сабаби рӯ овардани занон ба либоси бегона тақлидкорӣ, мӯд пиндоштани чунин либосҳо ва намоиш додани мазҳабӣ будани худ, водорсозӣ аз ҷониби шавҳар ва дигар аъзои оила, инчунин, таъсири фарҳанги бегона тавассути тамошои кинофилмҳо ва дигар василаҳо мебошад. Вале дар шаҳри Панҷакенти бостонӣ дар ягон макон занону бонувонро бо либосҳои ба фарҳанги мо бегона надидем. Ҳамаи занону бонувон, ҳатто муовини раиси шаҳри Панҷакент либоси миллӣ ба бар намуда буданд.

Хулоса, форуми вилоятии ҷавонон таҳти унвони “Мо ҷавонони хушбахти сарзамини биҳиштосо” ва сайру саёҳат ба шаҳрҳои таърихиву қадимаи Истаравшан ва Панҷакент дар “Соли ҷавонон” чорабинии хотирмон ва кори ниҳоят муҳим буда, ба боло рафтани худшиносӣ, ҳисси миллӣ ва ватаншиносии ҷавонон таъсири назаррас гузошт.

Шӯҳрат САИДОВ, раиси Шӯрои олимони ҷавони ДДҲБСТ

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Декабр 2022 c.