Бо ташаббуси Кумитаи кор бо ҷавонон ва варзиши назди Ҳукумати ҷумҳурӣ дар якҷоягӣ бо мақомоти иҷроияи ҳокимияти давлатии шаҳри Душанбе ва Федератсияи футболи Тоҷикистон Форуми ҷумҳуриявии намояндагони ҷавони вазорату идораҳо ва ташкилоту муассисаҳо баргузор гардид.

Форуми мазкур дар доираи нақшаи чорабиниҳои Кумита бахшида ба Рӯзи ҷавонони Тоҷикистон дар бинои Муассисаи давлатии “Душанбе - Плаза” таҳти унвони “Ҷавонон – пайрави Пешвои миллат” бо иштироки беш аз 100 нафар мутахассисони ҷавон гузаронида шуд.
Раиси Кумитаи кор бо ҷавонон ва варзиш Аҳтам Абдуллозода дар оғоз ҳозиринро ба муносибати баргузории моҳвораи ҷавонон ва Рӯзи ҷавонони Тоҷикистон, ки пас аз чанд рӯз дар сартосари кишвар бо шукӯҳу шаҳомати хосса ҷашн гирифта мешавад, табрику таҳният гуфта, ба эшон файзу баркат, нерӯву тавони нав ва дар фаъолияти пурсамари хизматӣ бурдборию комёбиҳо таманно намуд:

- Мо хуб огоҳ ҳастем, ки таҷлили Рӯзи ҷавонон падидаи замони истиқлолият буда, иқдоми бевоситаи Асосгузори сулҳу ваҳдати милли - Пешвои миллат, муҳтарам Эмомалӣ Раҳмон бо мақсади дастгирии пайвастаи ҷавонон ва қадрдонӣ аз заҳмату талошҳои онҳо баҳри нафъи Ватану миллат амалӣ мегардад. Боиси хушнудист, ки имрӯз дар роҳи ҳалли масъалаи ҷавонон дар тамоми солҳо аз ҷониби давлату Ҳукумат тадбирҳои мушаххас роҳандозӣ гардида истодааст. Дар ин радиф фаромӯш набояд сохт, ки дар партави сиёсати ҷавонпарваронаи Президенти кишвар, муҳтарам Эмомалӣ Раҳмон эълон гардидани соли 2017 “Соли ҷавонон” барои кулли ҷавонони кишвар тӯҳфаи фаромӯшнашванда ва ҳар як рӯзи соли сипаригашта саршор аз таваҷҷуҳу ғамхорӣ ва дастоварду комёбӣ буд. Тавре ки дар Паёми навбатии Президенти кишвар таъкид гардид, ғамхории Ҳукумат нисбат ба ҷавонон танҳо бо “Соли ҷавонон” маҳдуд намешавад, баръакс ҳалли масъалаи вобаста ба наврасону ҷавонон минбаъд низ ҳамчун самти муҳимтарини фаъолияти мо интихоб хоҳад гардид - иброз дошт А. Абдуллозода.

Раиси кумита дар идома аз мухассисони ҷавони вазорату идораҳо ва ташкилоту муассисаҳо даъват ба амал оварда таъкид намуд, ки онҳо бояд дар партави сиёсати Пешвои миллат дар раванди ҷаҳонишавӣ ва шиддат гирифтани муборизаҳои иттилоотӣ, ҳамзамон воридшавии мафкураи бегона ба зеҳни ҷомеа, роҳи дурусти тавсияи тафаккури миллӣ, таҳкиму устуворгардонии пояҳои давлатдории навини тоҷик ва рушди иҷтимоию сиёсии ҷомеаро пеша намоянд.

Ҳамзамон дар рафти форум намояндагони ҷавони вазорату идораҳо ва ташкилоту муассисаҳо дар доираи мавзӯи мазкур маърӯзаҳо намуданд.