Дар Ҷамоати деҳоти Чӯянгарони шаҳри Ваҳдат миёни аскарону афсарон ва ҷавонони синни то даъват мулоқот баргузор гардид.

Мудири Бахши ҷавонон, варзиш ва сайёҳии шаҳри Ваҳдат Азиззода Маъруфҷон ҳозиринро бо фарорасии 24-умин солгарди таъсисёбии Қувваҳои Мусаллаҳи Ҷумҳурии Тоҷикистон табрик намуда, дар идомаи суханрониаш аз Паёми Пешвои миллат ёдовар шуд. Ӯ таъкид намуд, ки имсол барои ҷавонон соли фаромӯшнопазир ва хотирмон хоҳад буд, зеро соли 2017 - Соли ҷавонон эълон гардидаву бо ҷашни бузурги миллат, 20-солагии Ваҳдати миллӣ тавъам афтодааст.

Сипас, раиси Ҷамоати деҳоти Чӯянгарон Баҳриддин Мирзоев ҷавононро барои ихтиёран ба Ватан хизмат кардан, ҳифзи марзу буми кишвар ва дӯст доштани Ватан ҳидоят намуд. Аскарон низ дар навбати худ аз ҳаёти аскарӣ қиссаҳо карда, ҷавононро ба хизмат кардан далолат намуданд.

Аз дохили толор 10 нафар ҷавон ба саҳна баромада, иброз доштанд, ки бо ихтиёри худ ба хизмати Ватан мераванд ва омодаанд, ки марзу буми кишварро мардонавор ҳимоят кунанд. Аз тарафи ҷавонони фаъол бошад, саҳначаҳои ҳаҷвию тарбиявӣ намоиш дода шуд.