ҶАВОНОН
Шанбе 20 Июл 2024 02:06
10454
Ҳамасола аз 1 июл имтиҳонҳои дохилшавӣ ба донишгоҳу донишкадаҳои кишвар тариқи Маркази миллии тестӣ оғоз мегардад. Хонандагоне, ки худро тариқи ин марказ номнавис кардаанд, пас аз супоридани имтиҳонҳо ва гирифтани холҳои муносиб сазовори номи донишҷӯ мешаванд.

Тибқи иттилои Маркази миллии тестии назди Президенти Ҷумҳурии Тоҷикистон нақшаи қабули донишҷӯён барои иштирок дар имтиҳонҳои марказонидаи дохилшавӣ дар соли 2024 миёни синфҳои 11 дар умум 96 ҳазору 164 нафарро ташкил медиҳад, ки нисбат ба соли гузашта 9 ҳазору 652 (105 ҳазору 816) нафар кам мебошад.

Нақшаи қабули донишҷӯён дар синфҳои 9 бошад, 13 ҳазору 51 нафарро ташкил дода, нисбат ба соли сипаригардида 2 ҳазору 279 (15 ҳазору 330) нафар кам мебошад.

Дар умум аз 96 ҳазору 164 нафари нақшаи қабули донишҷӯён дар 5 гурӯҳи ихтисосҳо то ҳол ҳамагӣ 78 ҳазору 231 нафар номнавис шудаанд, ки агар онҳо донишҷӯ гарданд, тахминан 81,35 фоизи иҷрои нақшаро ташкил медиҳад.

Шодиниё Абдулбосит, муовини якуми директори Маркази миллии тестии назди Президенти Ҷумҳурии Тоҷикистон зимни суҳбат зикр намуд, ки айни замон аз ҷониби марказ корҳои омодагӣ бо мақсади омода кардани марказҳои имтиҳонӣ ва ҳамчунин маводҳо барои имтиҳонҳои даври якуми дохилшавӣ идома дорад.

Номбурда таъкид менамояд, ки то оғози имтиҳонҳои дохилшавӣ фурсати кам мондааст. Аз ин рӯ, довталабонро зарур аст, ки зимни пур кардани ҷавобҳо аз варақаи сиёҳнавис ба варақаи асосӣ бодиққат бошанд, чунки он танҳо як нусха буда, онро иваз карда намешавад. Ба инобат гирифтани нуктаи мазкур аз ҷониби ҳар довталаб муҳим аст, то дар оянда мушкил пеш наояд.

Хонандагоне, ки худро дар Маркази миллии тестӣ номнавис кардаанд, барои имтиҳонҳо омодагӣ мегиранд, то ба ихтисосҳои интихобкарда дохил шаванду таҳсилро дар ҷодаи дӯстдошта идома диҳанд. Орзуи солҳо дар дил парварида ҷомаи амал пӯшаду сазовори номи донишҷӯ бигарданд.

Бузургмеҳр Иброҳимзода, ки ба соҳаи тиб таваҷҷуҳ дорад, ҳуҷҷатҳои худро ба гурӯҳи ихтисосҳои 5-ум супоридаву мехоҳад, ки таҳсилро дар ин самт идома диҳад. Ӯ айни ҳол барои имтиҳонҳои дохилшавӣ тайёрии ҷиддӣ дида истодааст. Тавре худи ӯ иброз медорад:

“Нахуст ихтисосҳоямро интихоб кардаму баъдан онҳоро ба волидон нишон додам. Пурсидам, ки дар сурати шартномавӣ дохил гардиданам, буҷаи оила ба ин маблағҳо мерасад ё не? Волидонам ба ихтисосҳои интихобкардаам зид набаромаданд ва аз ман ҳимоят карданд. Зеро онҳо медонанд, ки соҳаи тиб ба ман хеле писанд аст ва барои дохил шудан ба ихтисоси дӯстдоштаам чи қадар талош дорам”.

Ба назари қаҳрамони мо ҳар нафаре зимни интихоби касби оянда, баробари ба назар гирифтани буҷаи оила ва имконияту шароит, ҳамчунин ба кадом касб ва ё ҳунар бештар дилбастагӣ доштанашро бояд ба назар гирад, зеро дар он сурат омӯзиш ва фаъолият барояш лаззатбахшу осонтар мегардад.

- Ҷавононро лозим аст, ки зимни интихоби касби ояндаи худ мустақил бошанд. Маҷбуран ихтисосҳои барояшон писанд набударо интихоб накунанд. Зеро барои омӯхтани он солҳо вақт сарф мекунем ва оянда аз рӯи он нон мехӯрему дар ҷомеа обрӯ пайдо мекунем. Аз ин рӯ, моро мебояд ки нисбат ба ояндаи худ бепарво набошем, - баён дошт ӯ.

- Ман худро дар гурӯҳи ихтисосҳои 4-ум, яъне “Ҷомеашиносӣ ва ҳуқуқ” номнавис кардаам. Аз хурдӣ орзу дорам, ки ҳуқуқшинос шаваму дар оянда ба халқу миллати хеш сидқан хизмат намоям. Ихтисосҳои интихобкардаам низ бештар ба ин соҳа марбутанд. Онҳоро бо хоҳиши худ интихоб кардааму волидонам низ иҷозат доданд, ки дар сурати муваффақ гардидан, таҳсилро дар ин ҷода идома диҳам, - мегӯяд Зулҳиҷа Комилова, ки айни замон барои имтиҳонҳои дарпешистода тайёрӣ мебинад.

Зулҳиҷа ба он назар аст, ки интихоби дурусти касб ба ояндаи шахс таъсири калон дорад. Чи гунае, ки ӯ иброз медорад: “Борҳо шунидаам, ки одамон мегӯянд, солҳо дар ҷое фаъолият кардаам, ки худ намехостам. Фикр мекунам, ки вақте шахс дар ҷойи ба худаш писанд кор намекунад, маънои зиндагиашро гум мекунад. Аз ин рӯ, ба ҳамсолонам маслиҳат медиҳам, ки нахуст ба садои дилашон гӯш диҳанду аз ақлашон истифода баранд ва касби дӯстдоштаи худ-ро омӯзанд. Ба гапҳои дигарон аҳамият надиҳанду ба талошашон идома диҳанд, то ба мақсаду ниятҳояшон бирасанд. Дар замони ҳозира тамоми шароиту имкониятҳо фароҳам оварда шудааст. Аз онҳо истифода намоянду хуб таҳсил намоянд, то дар оянда мисли баъзеҳо нагӯянд, ки чаро дар вақташ нахондем”.

Оятулло Ғайратзода ҳуҷҷатҳои худро дар гурӯҳи ихтисосҳои 3-юм - “Филология, педагогика ва санъат” сабти ном кардаву бештар ихтисосҳои ба забонҳои хориҷӣ рабтдоштаро интихоб кардааст.

- Чун ба забондонӣ таваҷҷуҳи зиёд дорам, онҳоро бештар интихоб кардаам. Волидонам низ ба ихтисосҳои интихобкардаам муқобил набаромадаву розианд, ки дар сурати шартномавӣ дохилшавиам маблағи онро пардохт намоянд. Умедворам, ки ба ихтисоси дӯстдоштаи худ ройгон мегузарам. Ва айни ҳол барои имтиҳонҳои марказ омодагӣ гирифта истодаам, то онҳоро бомуваффақият супорам, - афзуд Оятулло.

Қаҳрамони мо ба ҳамсолони мисли худ тавсия медиҳад, ки зимни интихоби касби ояндаи худ ҷиддӣ бошанд. Касберо интихоб намоянд, ки ба он шавқу ҳавас доранд ва ояндаи худро дар он соҳа дидан мехоҳанд. Дар идома гуфт: “Волидонам нахуст мехостанд, ки ман гурӯҳи ихтисосҳои 5-умро интихоб намоям, вале ба онҳо фаҳмонидам, ки забонҳои хориҷӣ ба ман бештар писанд аст. Бовар дорам, ки дар омӯзиши касби писандидаам муваффақ хоҳам шуд”.

Гулафшон КАРИМОВА, “ҶТ”

Эзоҳи худро нависед



Рамзҳо дар расм