Дар аксияи ҷумҳуриявии “Мо ҷавонон ба гузаштагон эҳтиром мегузорем!”, ки бо дастури Кумитаи кор бо ҷавонон ва варзиши назди Ҳукумати ҷумҳурӣ аз 23 то 26 июни соли 2017 дар тамоми миқёси кишвар роҳандозӣ гардида буд, 11204 нафар ҷавонон иштирок намуданд.

Кумитаи кор бо ҷавонон ва варзиш дар арафаи Иди Рамазон ва “Соли ҷавонон” ҷиҳати тозаву озода намудани қабристону оромгоҳҳо дар саросари кишвар аксияи ҷавононро таҳти шиори “Мо ҷавонон ба гузаштагон эҳтиром мегузорем!” эълон намуд.

Бо мақсади дар сатҳи баланд баргузор намудани иқдоми мазкур масъулини Кумита ба тамоми сохторҳои маҳаллии худ дастур доданд, ки ҷавонони ташаббускори маҳал барои саҳм гузоштан ба иқдоми пешгирифтаи Кумита ҷалб карда шаванд.

Бо назардошти тадбирҳои андешидаи Кумита дар чорабинии мазкур иштироки фаъолонаи ҷавонон таъмин гардид, ки дар натиҷа баҳри пос доштани хотираи гузаштагон 157 қабристон ва оромгоҳҳо тоза карда шуданд.

Аз ҷумла дар аксия “Мо ҷавонон ба гузаштагон эҳтиром мегузорем!” 5 оромгоҳ бо иштироки 140 ҷавон дар вилояти Мухтори Кӯҳистони Бадахшон, 30 оромгоҳ бо иштироки 3600 ҷавон дар вилояти Хатлон, 39 оромгоҳ бо иштироки 1750 дар вилояти Суғд ва 83 оромгоҳ дар шаҳру ноҳияҳои тобеи марказ бо иштироки 5714 ҷавон тоза карда шуданд.

Лозим ба ёдоварист, ки иқдоми мазкур метавонад дар ниҳоди насли ҷавон эҳсоси гарми худшиносию худогоҳӣ ва арҷгузоштан ба ниёгону гузаштагонро афзун намояда, дигар қишри ҷомеаро баҳри пеша намудани ин иқдоми шоиста раҳнамуд созад.