Рӯзи дуюмро ҷавонон ва донишҷӯёни давлатҳои СҲШ ва ИДМ бо машқи пагоҳирӯзӣ оғоз намуданд.

Пас аз машқи пагоҳирӯзӣ иштирокчиёни Фестивали байналмилалии ҷавонон ва донишҷӯёни давлатҳои СҲШ ва ИДМ таҳти унвони “Тоҷикистон ва роҳи абрешим: таърих ва замони муосир” дар маросими ифтитоҳи Мактаби тобистонаи иҷтимоии инноватсионӣ барои ҷавонон иштирок намуданд, ки басо ҷолиб буд. Зеро зимни ифтитоҳ аз ҷониби хонандагони Мактаби Президентии барои хонандагони болаёқати шаҳри Бӯстон намоиши рақсии “Дӯстии миллатҳо” намоиш дода шуд.

Назира Ғаффорӣ, муовини раиси вилояти Суғд ва Дилноза Аҳмадзода, муовини раиси Кумитаи кор бо ҷавонон ва варзиш зимни суханрониҳо меҳмононро хайрамақдам намуда, сипас ба кори Мактаби тобистонаи иҷтимоии инноватсионӣ расман ҳусни оғоз бахшида, меҳмонон аз намоиши ихтироот ва дастовардҳои донишҷӯёни тоҷик дидан намуда, чанде аз он онҳо, ки ҷавонони кишварҳои хориҷа буданд, таассуроташонро баён намуданд.

Бекаристон Амонҷонов, иштирокчии форум аз кишвари Қазоқистон, зимни баёни таассуроти хеш бисёр хушҳол буд, ки дар чанд рӯзи буданаш дар Тоҷикистон алаккай каме забони тоҷикиро ёд гирифтааст ва суҳбатро бо забони ноби тоҷикӣ оғоз намуда, гуфт:  “Салом алейкум дӯстони ман. Хоҳиш мекунам, инро дар нигоштаи хеш қайд кунед. Зеро ман аз ворид шудан ба Тоҷикистон кӯшиш карда истодаам, ки забони тоҷикиро омӯзам...Бароям бисёр фараҳбахш аст, ки дар чунин ҳамоиш иштирок дорам. Фестивал на танхо дӯстии моро қавӣ намуд, балки он аз якдигар омӯхтанро дар мо бештар талқин сохт. Мо ин ҷо бо ихтирооти навин ошно шудем. Ҷавонони тоҷик дастовардҳои худро барои мо сода намуда, муаррифӣ намуданд. Мо  ба ҷавонони тоҷик эҳтироми хоса дорем ва аз ин ба баъд низ кӯшиш мекунем, ки риштаи дӯстии мо аз ин ҳам бештар мустаҳкам  гардад".

Королина Линская, намояндаи дигар аз кишвари Молдова, бо ҳаяҷон ва самимияти хоса таассуроти худро оиди табиати афсонавии Тоҷикистон чунин баён кард: “Ҳангоми аз Душанбе ба Суғд омадан, таваҷҷуҳи маро дарёҳои кишвари шумо ҷалб намуд. Онҳо аз миёни кӯҳҳои осмонбус ҷорӣ мешаванд. Ин гуна дарёҳо дар кишвари мо кам дида мешавад. Боду ҳавои кишвари шумо бисёр хуб аст. Аз ин рӯ диққати маро бештар ҷалб намуд. Айни ҳол ки мо аз намоиши дастовардҳои ҷавонони тоҷик дидан намудем, якчанд ихтироотро бо дастгирии ҷавонони кишвари шумо барои худ қайд кардам, ки барои дар шароити кишвари мо низ созгор аст. Вақте аз ин ҷо меравам, ин ихтироотро ба масъулини кишварамон мерасонам ва албатта, ки дар куҷое набошам, аз меҳрубонӣ ва меҳмоннавозии мардуми тоҷик хоҳам гуфт, ки воқеан меҳмондӯстдору самимиянд”.

Чорабиниҳои дигари Фестивали байналмилалии ҷавонон ва донишҷӯёни давлатҳои СҲШ ва ИДМ таҳти унвони “Тоҷикистон ва роҳи абрешим: таърих ва замони муосир” идома дошта, аз рафти он дар гузоришҳои минбаъда иттилоъ хоҳем дод.