Дар шаҳри Кӯлоб зимни баргузории ярмаркаи ҷойҳои кори холӣ ва вазифаҳои озод 220 нафар иштирок намуда, аз тарафи ташкилоту муассисаҳои шаҳр 78 ҷойҳои кори холӣ пешниҳод гардид, ки 25 нафар ҷавон бо кори доимӣ ва 50 нафари дигар барои касбомӯзӣ сафарбар шуданд.

15 август дар боғи фарҳангӣ-фароғатии шаҳри Кӯлоб бо ташаббуси Бахши кор бо ҷавонон ва варзиши шаҳри Кӯлоб дар якҷоягӣ бо шуъбаи Агентии меҳнат ва шуғли аҳолии шаҳр, бахшида ба “Соли ҷавонон” ярмаркаи ҷойҳои кори холӣ ва вазифаҳои озод баргузор гардид.

Дар ярмаркаи мазкур ҷавонон аз тамоми маҳаллаҳои шаҳр иштирок намуда, баҳри пайдо намудани ҷои кори муносиб бо масъулини корхонаву муассисаҳои гуногуни давлатӣ ҳамсуҳбат шуданд.

Ба иттилои масъулини Бахши кор бо ҷавонон ва варзиши шаҳр, 20 нафар ҷавондухтарон ба курсҳои кӯтоҳмуддати дӯзандагӣ ва 80 нафари дигар барои омӯзиши курсҳои кӯтоҳмуддати забонҳои хориҷӣ ҷалб карда шуданд.

Умед МИРЗОЕВ, “ҶТ”