Тибқи нақшаи Мақомоти иҷроияи ҳокимияти давлатии вилояти Суғд раисони шаҳру ноҳияҳо бо донишҷуёни ноҳияҳои худ вохурда, аз наздик бо онҳо мулоқоту мушкилии онҳоро баррасӣ менамоянд.

Чанд рӯз пеш дар маҷлисгоҳи Донишгоҳи техникии Тоҷикистон ба номи академик Муҳаммад Осимии шаҳри Душанбе мулоқоти Сулаймонзода Акрам Раҳим, раиси ноҳияи Спитамен, бо донишҷӯёни ноҳия, ки дар донишгоҳ ва коллеҷҳои пойтахти кишвар таҳсил менамоянд, баргузор гардид.

Сулаймонзода Акрам Раҳим, раиси ноҳияи Спитамен, зимни баромади хеш қайд намуд, ки “айни ҳол дар шуъбаи рӯзонаи донишгоҳҳои олӣ ва миёнаи касбӣ аз ноҳия донишҷӯёни зиёде таҳсил доранд. Пас аз хатми ин донишгоҳҳо онҳо ба халқу Ватани азизи худ хизмат намуда, дар пешравии ҷомеа саҳм хоҳанд гузошт. МИҲД ноҳия омода аст, ки барои дар оянда бо кор таъмин намудани донишҷӯён аз ҳамаи имконот истифода намоянд”.

Дар охир ба 43 нафар донишҷӯ кӯмакпулиҳои яквақтаи раиси ноҳия ва сипоснома супорида шуд.

Шералӣ АЗИМӢ, “ҶТ”