ҶАВОНОН
Чоршанбе 17 Июл 2019 07:27
5380
Барои насли ҷавон яке аз муҳимтарин мактаби тарбия ва обу тоби бадан ин хизмат дар сафи Қувваҳои Мусаллаҳи кишвар мебошад. Маҳз дар ҳамин ҷо ҷавонон ҷасорату мардонагӣ омӯхта, муқаддастарин арзишҳои ҳаёт ва содиқона муҳофизат кардани хоки поки Ватани азизи хешро меомӯзанд. Ба ҳамин далел миёни ҷавононе, ки хизмати Модар - Ватанро адо кардаанд, бо саволи “Хизмати Модар- Ватан ба шумо чӣ дод?” муроҷиат кардем.

Ато МАСТИБЕКОВ, сокини шаҳри Душанбе:

Ман яке аз ҳамон ҷавонони кишварам, ки тули ду сол дар қисми ҳарбии 07033 дар сафи Артиши миллии кишвар хизмат намудам. Аллбата, ҳар як ҷавонписар пеш аз хизмат рафтан онро ҳаргуна тасаввур мекунад. Ман ҳам пеш аз рафтан ба монанди ҳамон ҷавонҳо будам ва хизматро хело мушкил фикр мекардам. Вақте ки ба хизмат рафтам шароит хело хуб, муносибати кормандони қисми низомӣ дар сатҳи олӣ ба роҳ монда шуда буд. Дар Конститутсияи Ҷумҳурии Тоҷикистон моддаи 43 омадааст: “Ҳифзи Ватан, ҳимояи манфиати давлат, таҳкими истиқлолият, амният ва иқтидори мудофиавии он вазифаи муққадаси шаҳрванд аст”. Аз ин бармеояд, ки хизмат ин худ қарзи ҷонии ҷавонписарон мебошад. Баъди адои хизмат ба қадри дурии падару модар мерасем, муносибатамон бо атрофиён дигар мешавад.

Мирзо СИЯРОВ, сокини ноҳияи Нуробод:

- Ман бо хоҳиши худам ба хизмати Модар – Ватан рафта, қарзи ҷавонмардиамро дар қисми низомии 45085 Кумитаи ҳолатҳои фавқулодаи Вазорати мудофиаи гражданӣ адо намудам. Пеш аз хизмат рафтан дар он фикр будам, ки хизмат ҷойи душвор аст, аммо вақте рафта бо чашми худ дидам, дар он ҷо ягон душворӣ нест. Баръакс хизмат ба ман ҳисси ватандӯсти, муҳаббат ба Ватану миллат, аз ҳама муҳим мардонагиро омӯзонид. Боиси ифтихор аст, ки баъди адои хизмат атрофиён нисбати ба ман ҳамчун марди асил, ватандӯстдор ҳимоягари Ватан муносибат менамояд. Ман ба ҷавонони синни даъватӣ тавсия медиҳам, ки ба хизмат рафта модару Ватани худро ҳифз намоянд.

Алишер АФҒОНОВ:

- Ман баъди хатми Донишгоҳи технологии Тоҷикистон бо хоҳиши худам ба хизмати ҳарбӣ рафтам. Хизматро дар қисми низомии қушнҳои сарҳадӣ 2712 адо кардам. Баъди хизмати ҳарбӣ мехоҳам дар соҳаи ҳарбӣ кору фаъолият кунам ва дар ҳифзи Ватани азизам саҳмамро гузорам. Хизмат ба ман ҷасорату мардонагӣ, донистани техника ва яроқҳои ҳарбиро омӯзонд. Хуб мешавад, ки ҷавонписарони мо ҷавонмардӣ нишон диҳанду сарбаландона адои хизмат намоянд. Зеро хизмат мактаби хуби обутоби инсон, мактаби мардиву мардонагӣ буда, ҷавононро ба пастию баландии зиндагӣ тобовар менамояд. Ҳар ҷавоне, ки хизмат мекунад, ба қадри Ватан, модар, падар, ёру бародар мерасад. Ман инро аз таҷрибаи худ мегӯям. Чун баъди адои хизмат диди ман ба куллӣ дигар шуд. Меҳану атрофиён ба назарам бароям аз гузашта азизу бо қадр шуданд.

Анварҷон ҲУСЕЙНОВ:

- Дар ҳақиқат хизмат дар сафҳои Қувваҳои Мусаллаҳ натанҳо қарзи муқаддаси фарзандӣ, балки мояи ифтихор ва шарафи бузург аст. Мо бояд ҳама суханҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро хуб дарк намуда, ба бовариашон сазовор гардем. Нагузорем, ки осудагиву оромии кишвари моро касе халалдор намояд. Ҷавонони матиниродаи миллати тоҷик бояд бо хоҳиши худ баҳри ҳимояи Ватан - Модар раванд, аз хизмат саркашӣ накунанд, зеро хизмат худ мактаби ҷасорату матонат ва худшиносиву худогоҳӣ мебошад. Беҳуда нест, ки бузургон артишро мактаби мардонагӣ меноманд. Дар ин мактаби ҳаёт ба қадри Ватан-Модар бештар расида, ба тамоми пастию баландиҳои зиндагӣ тобовар ба воя мерасанд. Ҳамчун як сарбози қаторӣ аз ҳамаи он ҷавононе, ки синну солашон ба хизмати ҳарбӣ расидааст, даъват менамоям, ки ҳар як ҷавонмард бояд қарзи мардонагии худро дар назди Ватан иҷро намояд. Падару модарони азизу гиромиқадр садди роҳи фарзандон нашаванд, балки онҳоро ба ин роҳи ҷасорату ростӣ раҳнамуд сохта, андеша намоянд, ки фарзанди онҳо баҳри ҳифзу ҳимояи худи онҳо ду сол камари мардонагӣ ба миён мебандад.

Яқуб ЯҚУБОВ:

- Ман хизматро дар қисми низомии 2712 қушнҳои сарҳадӣ адо кардам. Хизмат намудан дар сафи Қувваҳои Муссалаҳ барои ҳар як ҷавонмард мактаби ҷасорату матонат, дӯстиву рафоқат ва худшиносию меҳанпарастӣ мебошад. Хизмат ба ман мустақилона зиндагӣ карданро омӯхт, қадри волидонро ба ман шиносонид, ҳифзи хоки Ватанро ба ман ёд дод. Аз тамоми ҷавонон даъват ба амал меорам, ки аз хизмати Модар-Ватан саркашӣ накунанд. Дарк намоянд, ки будани онҳо дар сафи Қувваҳои Мусаллаҳи кишвар маънии онро дорад, ки модару хоҳари онҳо бо шарофати ӯ дар тинҷию амонӣ қарор доранд. Дарк намоянд, ки хизмат қарзи фарзандии ҳар яки ҷавони бо нангу номус аст. Дарк намоянд, ки хизмат шараф аст. Дарк намоянд, ки агар мо Ватани худро ҳимоя накунем, пас кӣ онро бояд ҳимоя кунад?

Мӯниса ДОДОВА,
Малоҳат ХОЛМУРОДОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Июл 2019 c.