31 – уми август дар Китобхонаи миллии Тоҷикистон бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дар ҳамкорӣ бо шарикони рушд - Шӯрои кор бо ҷавонони ИДМ ва Шӯрои ҷавонони СҲШ конфронси байналмилалии ҷавонон таҳти унвони “Таҳкими ҳамкориҳои бисёрҷониба дар самти муқовимат бо ҷалби ҷавонон ба гурӯҳҳои мухталифи хатарзо” баргузор гардид.

Дар конфронси мазкур, роҳбарияти вазорату идораҳои дахлдор, ҷавонони фаъол ва намояндагони СҲШ ва ИДМ аз дигар кишварҳо тариқи онлайнӣ иштирок ва суханронӣ намуданд.

Дар оғози конфронс Ризо Назарзода, муовини аввали раиси КҶВ иштирокчиён ва меҳмононро ба муносибати 30-солагии Истиқлоли давлатии Ҷумҳурии Тоҷикистон, 30-солагии Иттиҳоди Давлатҳои Мустақил ва 20-солагии таъсисёбии Созмони Ҳамкории Шанхай табрик гуфта, таъкид намуд, ки сарони кишварҳои узви СҲШ дар муроҷиати муштарак ба ҷавонон эътироф намуданд, ки дар шароити афзоиш ёфтани мабдаъҳои бесуботӣ дар фазои минтақаҳо ва кишварҳои азим, аз ҷумла дар кишварҳои ҳамҳудуд бо кишварҳои СҲШ, ҷавонон ба объекти таваҷҷуҳи ҷиддӣ ва таъсири ҳадафмандонаи ташкилотҳои мухталифи террористӣ ва ҳаракатҳои ифротгаро табдил ёфта, ин гурӯҳҳо мехоҳанд ба шуури нопухтаи ҷавонон таъсир гузошта, онҳоро ба фаъолиятҳои худ ҷалб кунанд.

“Дар робита ба ин, дар қарори Шӯрои сарони ҳукуматҳои ИДМ ва Стратегияи ҳамкории байналмилалии ҷавонони кишварҳои узви ИДМ барои солҳои 2021-2030 қайд шудааст, ки ҳамкориҳои байналмилалии ҷавонони кишварҳои узви ин созмон дар самти пешгирии экстремизм ва терроризм дар байни ҷавонон, пешгирии паҳншавии ксенофобия ва таҳаммулнопазирӣ дар байни ҷавонон амалӣ карда мешавад,”-гуфт Ризо Назарзода.

Инчунин номбурда илова намуд, ки дар Стратегияи ҷавонони СММ ҷавонон ҳамчун катализатор барои амалиётҳои сулҳ, амният ва амалҳои башардӯстона эътироф гардида, муқаррар шудааст, ки онҳоро дар ин самт дастгирӣ бояд кард.

Сипас, Умеда Абдуллозода, муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон суханронӣ намуда, таъкид кард, ки “Бадбахтона ба гурӯҳҳои инфротиву террористӣ занон ва ҷавондухтарон низ ҳамроҳ ҳастанд. Мо бисёр кӯшиш мекунем, ки бо онҳо бисёртар кор намуда, онҳоро аз роҳҳои бад дур созем. Чун мо дар як фазои озод умр ба сар бурда истодаем. Ҷавонон бояд аз ҳамаи ин ободкориҳо истифода бурда, дар оянда кишвари моро боз ҳам ободу зеботар гардонанд”.

Дар идома, Ҳабибулло Амирбекзода, муовини раиси Кумитаи рушди сайёҳӣ иброз дошт, ки бо вуҷуди кам шудани тамоюли ҷавонон ба гурӯҳҳои ифротиву террористӣ ҳанӯз ҳам ин масъала барои кишварҳои минтақа ҳалношуда боқӣ мондааст. Аз ин рӯ мебояд корро дар ин самт ниҳодҳои дахлдор ва масъулини соҳа ҷиддан ба роҳ монанд, то насли минбаъда аз имрӯзиён ба некӣ ёд кунанд.

Бо ҳамин чанде дигар аз иштирокчиён баромад намуда, доир ба хавфу хатар ва оқибатҳои майл кардани ҷавонон ба гурӯҳҳои эктремистиву террористӣ андешаҳои хешро изҳор доштанд.