Хурсанд аз рӯзҳои нахустини ба донишгоҳ ворид гардиданаш доим дар ин фикр буд, ки дар самти пешанамудааш навгониеро ба вуҷуд биёраду дар асри илму технологияи навин ҳамнабзи замон бошад. Ҳамин ҳадаф ӯро дар натиҷа ба ихтирои таҷҳизоти нав муваффақ гардонид. Шабу рӯз заҳмат мекашид ва ниҳоят механизмеро бо “Култиватор – нуриандозу молакунандаи хок” сохт.

Механизми сохтаи Хурсанд барои коркард ва ба кишт тайёр намудани хок пешбинӣ шудааст: “Сохти ин мошинолот аз олотҳои кории чизелӣ, ки тавассути рама дар се қатор ҷойгир шудаанд ва ду адад чархҳои такя иборат аст. Металлғунҷоиши калони механизмҳои мавҷуда, ки ҳангоми иҷрои кор боиси хароҷотҳои энергетикии зиёдатӣ мешавад, воридсозии нуриҳои минералӣ ва сихмоласозии хокро пешбинӣ накардааст. Дар натиҷаи омӯзиши масъала мо мошинолоти навро ҷиҳати ба кишт тайёр кардани хок ихтироъ намуда, шумораи таҷрибавии онро сохтем. Мақсад аз ихтирооти мазкур кам кардани ҳолати металлғунҷоишии мошина, сарфашавии хароҷоти энергетикӣ-сузишворӣ, баланд бардоштани манёврнокии агрегат, беҳтар кардани сифати иҷроиши амалиётҳои технологии ба кишт тайёр кардани хок мебошад”.

Тарзи кори “Култиватори нуриандозу молакунандаи хок”: ҳангоми иҷрои ҳаракати пешраванда олотҳои корӣ ба хок даромада, онро коркард менамоянд. Чархи такя–ҳаракатдиҳанда аз таъсири муқовимати замин тавассути занҷири интиқоли ҳаракат асбобҳои нуригузаронро, ки дар зери зарф ҷойгир мебошанд, ба кор дароварда нуриҳои минералиро тавассути қубури нуригузар ва олоти корӣ ба зери хок мерезад. Пас аз ин сихмола хокпохсаҳоро реза карда, заминро барои кишт тайёр менамояд.

- Бартарии мошинаи пешниҳодшаванда дар он аст, ки дар як гузашт хокро коркард намуда, ба дохили он нуриҳои минералиро ворид менамояд ва тавассути сихмола хокпохсаҳоро реза карда, ба кишт омода месозад”, - мегӯяд Хурсанд Назиров.

Хурсанд Назиров 15 январи соли 1989 дар деҳаи Гулрези шаҳри Ваҳдат, дар оилаи зиёӣ таваллуд шудааст. Соли 2007 МТМУ №12 шаҳри Ваҳдат ва соли 2012 Донишгоҳи аграрии Тоҷикистон ба номи Ш. Шоҳтемурро бо ихтисоси муҳандис-механики кишоварзӣ ба итмом расонидааст. Аз моҳи сентябри соли 2015 дар Институти боғпарварию сабзавоткории Академияи илмҳои кишоварзии Тоҷикистон ҳамчун ходими калони илмии шуъбаи ниҳолпарварӣ фаъолият менамояд. Аз моҳи январи соли 2016 инҷониб аспиранти Институти боғпарварию сабзавоткории АИКТ аст.

Беҳрӯз ХОЛМУРОДОВ, “ҶТ”