Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дирӯз бахшида ба моҳвораи ҷавонон дар Вазорати маориф ва илми кишвар курси омӯзишӣ таҳти унвони “Аввалин мактаби сайёри ҷавондухтарони роҳбар” баргузор гардид.

Дар курси мазкур Абдулхолиқзода Лутфия Абдулхолиқ, муовини вазири маориф ва илми Ҷумҳурии Тоҷикистон ва як қатор ҷавондухтарон аз сохтору идораҳои гуногун ширкат варзиданд.
Абдулхолиқзода Лутфия Абдулхолиқ дар курси мазкур дар мавзӯи “Нақши Пешвои муаззами миллат дар омода намудани роҳбарон аз ҳисоби ҷавонзанони лаёқатманд” баромад намуда, таъкид кард, ки дар ягон давру замон дар ягон миллат то ин дараҷа дастгирӣ нисбати занону бонувон набуд. Бо дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳар як минтақаи ҷумҳурӣ занону бонувон барои пойдор будани сулҳу субот саҳми арзандаи худро гузошта истодаанд. Дастгирии пайваста ва ғамхориҳо нисбати занон аз ҷониби Пешвои миллат баръало дида мешавад.

Ба таъкиди масъулин ҳадаф аз ташаббуси чунин курсҳои омӯзишӣ дар он аст, ки ҷавондухтарону бонувон аз раванди кору фаъолияти роҳбарони муваффақ бархурдор шаванд ва аз нозукиҳои фаъолияти роҳбарӣ огаҳ гарданд.   

Ёдовар мешавем, ки курси омӯзишии “Аввалин мактаби сайёри ҷавондухтарони роҳбар” дар дигар вазорату идораҳо то 27-уми майи соли равон идома меёбад.

Таҳмина ЮСУФОВА “ҶТ”