Рӯзи дуввуми меҳмонии ҷавонони ҷумҳурӣ таҳти унвони “Дӯст ояд, гарм дар оғӯш гир!” дар шаҳру ноҳияҳои вилояти Суғд бо оғози як конфронси сатҳи баланд дар қасри фарҳанги ноҳияи Деваштич шуруъ шуд.

Пас аз итмоми конфронс, ки таҳти унвони "Ҷавонон - пайравони Пешвои миллат" ҷараён гирифта буд, гурӯҳи ҷавонон ба шаҳри Бӯстон сафар карданд. Дар боғи фарҳангӣ - фароғатии ба номи Садриддин Айнии шаҳр ҷавононро намояндагони мақомоти иҷроияи ҳокимияти давлатии шаҳри Бӯстон ва масъулини бахши кор ҷавонон ва варзиш бо нону намак пешвоз гирифтанд.

Баъд аз ин дар Донишкадаи кӯҳию металлургии Тоҷикистон, ки дар ҳамин шаҳр қарор дорад, конфронс таҳти унвони "Нақши ҷавонон дар тарғиби ғоя ва арзишҳои миллӣ" баргузор шуд.

Дар кори конфронс, ки бо иштироки Сураҷ Чоршанбезода, муовини раиси Кумитаи кор бо ҷавонон ва варзиш, Мавсума Муинӣ, раиси шаҳри Бӯстон ва намояндагони тамоми минтақаҳои кишвар баргузор шуд, масъалаҳои мубрами ҳаёти ҷавонон мавриди баҳсу баррасӣ қарор гирифт.

Мавсума Муинӣ зимни суханронии худ қайд кард, ки ҷавонон ҳамеша дар маркази таваҷҷуҳи роҳбарияти олии кишвар қарор доранд ва хуб аст, ки имрӯз ҷавонон бо дарки ғамхориҳои Президенти кишвар содиқона пайи донишомӯзиянд ва дар рушди ҷодаҳои гуногун саҳми худро гузошта истодаанд.

Баъдан Сураҷ Чоршанбезода ба минбар баромада, иброз дошт, ки ҷавонон бояд муҳофизу таҳкимбахши арзишҳои миллӣ бошанду муаррифгари он дар арсаи ҷаҳон. Зеро маҳз арзишҳои миллии мост, ки миллати моро дар арсаи байналмилалӣ мешиносанду эътирофу эҳтиром мекунанд.

Пас аз ба итмом расидани конфронс ҷавонон дар ин шаҳр аз корхонаҳои саноатӣ дидан карданд. Баргузории барномаи фарҳангии шоми дӯстӣ анҷомбахши рӯзи дуввуми меҳмонии ҷавонон дар вилояти Суғд гардид.

Баъди шоми дӯстӣ ҷавонон бо усули хона ба хона дар манзили сокинони шаҳр меҳмон шуда, бо соҳибхонаҳо суҳбатҳои гарму самимӣ анҷом доданд.