ҶАВОНОН
Сешанбе 17 Июл 2018 04:45
4017
Ба умқи оби баҳр ғутта задан ҳамеша дар қалбҳо шавқу завқ ва эҳсоси наҷибу ҳаяҷонангез ва афсункоронае бармеангезад. Меҳмонхонаҳои зериобӣ меҳмонони худро ба дунёи рангину нотакрори зери об раҳнамун месозанд. Солҳои охир шумораи чунин меҳмонхонаҳо дар ҳоли афзоиш аст. Ин, албатта, табиист, чунки сол то сол шумораи зиёди одамон ба шаклҳои наву муосир ва аҷоибу ғароиби саёҳату истироҳат мароқ зоҳир менамоянд. Чунин мавзеъҳои зеборо дар Дубай, Малдив, Занзибар, шаҳрҳои наздисоҳилии Флорида, Шветсия ва ғайраҳо мушоҳида кардан мумкин аст. Имрӯз аксари кишварҳои мутараққии дунё тарҳи сохтмони чунин меҳмонхонаҳо ва тарабхонаҳои зериобиро мекашанд.

ШУКӮҲУ ҶАЛОЛИ ҲАҚҚОНИИ ЗЕРИОБӢ

Яке аз чунин мавзеъҳои фароғативу истироҳатии ғайриодӣ меҳмонхонаи Poseidon Undersea Resort мебошад, ки дар наздикии харсанги зериобии Элеутра, дар ҷазираҳои Фриҷ воқеъ гардидааст. Он меҳмонхонаест, ки сохтмонаш зери роҳбарии муҳандисони амрикоӣ анҷом дода шудааст, вале рӯзи кушодашавии он то ҳол аниқ нест. Аммо далели он ки ин лоиҳа аз беҳтаринҳо эътироф гардидааст, бемуҳобот мебошад. Ин на танҳо меҳмонхонаи муқаррарии зериобӣ, балки шукӯҳу ҷалоли ҳаққонии зериобӣ аст.

Дар чуқурии 12 метр 25 ҳуҷраи бодабдабае ҷойгир шудаанд, ки ҳар кадоми онҳо майдони зиёда аз 51 м2 (ғайр аз ҳуҷраи “Наутилус, ки 300 м2 мебошад) дошта, бо шишаҳои ҳавоногузар маҳкам карда шудаанд. Онҳо мутобиқ ба тамоми талаботи бехатарӣ буда, тавре лоиҳакашӣ шудаанд, ки пеши назари меҳмонон олами ҷаззобу нотакрори умқи баҳрро ба маъраз мегузоранд. Ҳамзамон, ин хусусиятҳо ба шарофати қисматҳои нурафкани иморатҳо ғайрирасмӣ будани онҳоро халалдор намесозад.

ДУНЁИ РАНГИНИ ЗЕРИ ОБ

Ба умқи оби баҳр фурӯ рафтан ҳамеша таассуроти афсункорона ва сеҳрангезе мебахшад. Меҳмонхонаҳои зериобӣ ба меҳмонон имкон фароҳам меоранд, то худро як муддат ҷузъе аз олами сеҳрофари зери об тасаввур намоянд.

Чизи аз ҳама ҷолиб ин аст, ки равшанкунии ҳуҷраҳо идорашаванда буда, меҳмон имкон дорад, ки аз ҳуҷраи шахсии худ тавассути асбоби махсуси идорашавандаи фосилавӣ ба моҳиҳо ғизо диҳад. Ба умқи об фурӯ рафтан тавассути лифти махсус сурат мегирад. Ғайр аз ҳуҷраҳои хоб дар зери об ҳамчунин толорҳои варзишӣ, тарабхонаҳо, қаҳвахонаҳо, мағозаҳо, китобхона, толорҳои маҷлисгузаронӣ ва ҳатто калисои хурд барои ашхосе, ки тӯи хонадоршавии худро дар муҳити ғайриодӣ баргузор кардан мехоҳанд, вуҷуд доранд.

Барои боз ҳам беҳтар таҳқиқ намудани умқи об ба хоҳишмандон киштичаҳои зериобии дорои 3 ҷои нишаст пешниҳод карда мешаванд.

Меҳмонхонаи Poseidon Undersea Resort тибқи лоиҳаи Дэвид Брюса – шахсе, ки аз кӯдакӣ ба баҳр ишқу муҳаббати беканор дошт, бунёд гардидааст. Тамошои чунин мавзеи хушманзара ва афсонавӣ орзуи ҳазорҳо нафаронеро, ки зиндагии худро рангину бошукӯҳтар сохтан мехоҳанд, бароварда месозад. Ҳамарӯза барои истироҳат ва фароғат дар ин меҳмонхона тақрибан 150 000 нафар дархост пешниҳод менамоянд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Июл 2018 c.