Дар рӯзи дуюми Конфронси роҳбарони ҷавони давлатҳои СҲШ, 21 сентябр, ки дар шаҳри Хабаровскии Федератсияи Руссия баргузор гашта истодааст, намояндагони кишвари мо низ дар баробари 10 давлати иштирокчӣ баромад намуданд.

Аз ҷумла, намояндагони Ҷумҳурии Тоҷикистон Зубайдулло Маҳмадуллоев, дар мавзуи “Фаъолияти Иттифоқи ҷавонони Тоҷикистон дар байни ҷавонон, робитаи ҳамкорӣ бо ҷавонони кишварҳои аъзои СҲШ”, Маҳмадализода Абдулло, оиди лоиҳаи “Як роҳ ва як маром дар кишварҳои СҲШ ва ҳамкориҳои иқтисодии Аврупо” ва Маҳинбону Шарипова бо лоиҳаи “Меҳмонии ҷавонон ба минтақаҳои Тоҷикистон” маърӯза карданд.

Масъулин зимни баромадҳои хеш аз имконоту шароит ва дастгириҳои Ҳукумати кишвар дар самти сиёсати давлатии ҷавонон ёдовар шуда, таъкид намуданд, ки дар зери сиёсати ҷавонпарваронаи Пешвои миллат муҳтарам Эмомалӣ Раҳмон ҷавонон дар Ҷумҳурии Тоҷикистон ҳамеша дар мадди назари Ҳукумату давлат буда, барои рушди малакаи зеҳнии онҳо кулли шароитҳои мусоид фароҳам оварда шудааст.

Пас аз презентатсияи намояндагони кишвар иштирокчиёни аввалин Фестивали байналмилалии ҷавонон ва донишҷӯёни давлатҳои СҲШ ва ИДМ, ки дар Тоҷикистон аз 28-уми август то 1 сентябри соли ҷорӣ баргузор гашта буд, ҳузур доштанд, зимни суҳбати озод аз меҳмоннавозии тоҷикона ёдовар шуда, бо нону намак пешвоз гирифтани меҳмононро ҳамчун рамзи эҳтиром арзёбӣ намуданд.

Аз ҷараёни дигар конфронсу чорабиниҳои II-юмин Форуми роҳбарони ҷавони давлатҳои СҲШ, ки то 23 сентябр идома меёбад, дар гузоришҳои минбаъда иттилоъ хоҳем дод.


Шодихони НАЗАР, шаҳри Хабаровскии Федератсияи Руссия