Дар дуюмин ҳамоиши байналмилалии мутахассисони ҷавони соҳаи варзиш, ки моҳи сентябри соли равон дар шаҳри Сахалини ҷанубии Федератсияи Русия баргузор гардид, дар қатори дигарон мо ду нафар намояндагони Кумитаи миллии олимпии Ҷумҳурии Тоҷикистон иштирок намудем.

Барномаи мазкур аз ҷониби Кумитаи Бачаҳои Осиё ба хотири баланд бардоштани маҳорату малакаи кордонӣ ва пешниҳоди идеяҳо оид ба самтҳои гуногуни варзиш ва омода кардани варзишгарону мутахассисони ҷавон ҷиҳати иштирок дар бозиҳои олимпӣ ташкил гардид. Дар ҳамоиш зиёда аз 100 намоянда аз 19 мамлакатҳои Осиё иштирок намуда, муддати 5 рӯз семинарҳои омӯзишӣ оиди мавӯъҳои вобаста ба самти варзиш аз ҷониби роҳбарон ва намояндагони Кумитаи байналмилалии олимпӣ, Кумитаи олимпии Осиё, Кумитаи бачаҳои Осиё ва ҷоизадорони бозиҳои олимпӣ, ки дар маҷмуъ зиёда аз 50 маърӯзаро дар бар мегирифт, гузаронида шуда, масъалаҳои муҳим мавриди баррасӣ қарор гирифтанд.

Аз ҷумла, яке аз масъалаҳои муҳиме, ки дар ҳамоиш мавриди баррасӣ қарор гирифт, ин масъалаи нақши занон дар рушди варзиш ва омода кардани бонувони болаёқату кордон барои муаррифӣ намудани давлату миллат ва қитъаи Осиё дар арсаи ҷаҳон буд. Хушбахтона, аз тарафи узви шӯрои занони Кумитаи олимпии Осиё Наталия Сипович ба бонувони тоҷик баҳои баланд дода шуда, номбурда дар баромади худ чунин зикр намуд: “Ман аҳсан мегӯям ба роҳбарияти Ҷумҳурии Тоҷикистон ва роҳбарияти Кумитаи миллии олимпии Тоҷикистон, ки ба занон таваҷҷуҳи махсус дода, дар тамоми барномаҳо онҳо фаъолона иштирок менамоянд”.

Масъалаи дигаре, ки дар ҳамоиш мавриди баррасӣ қарор гирифт, ин ҷалб намудани ҷавонон ба фаъолияти ихтиёрӣ (волонтёрӣ) ва тарбия намудани онҳо ҳамчун мутахассиси кордон буд. Ҳамчунин, дар ҳамоиш мавзӯи аз сини хурдсолӣ ҷалб намудани кӯдакон ба варзиш ва омода кардани онҳо барои бозиҳои олимпӣ низ мавриди баррасӣ қарор гирифт. Аз ҷониби масъулин зикр гардид, ки бояд ҳама кумитаҳои олимпӣ кушиш намояд, ки бо дигар кишварҳо дар доираи шартномаҳои дӯстона муносибатро ба роҳ монда, варзишгаронро бештар ба машқҳои дастаҷамъона ҷалб намоянд.

Ҳамзамон барои муайян намудани беҳтарин иштирокчиён, номгӯи лоиаҳо дар бобати 4 мавзӯъ пешниҳод гардид. Мавзӯи интихобнамудаи намояндагон аз кишвари мо дар бобати фаъолияти ихтиёрӣ ва густариш додани варзишҳои намуди зимистона буд. Дар аввал фаъолияти ихтиёрӣ дар Ҷумҳурии Тоҷикистон ва шароити машғул шудан ба варзиши намудҳои зимистонаро муаррифӣ намуда, баъдан идеяҳои худро пешниҳод намудем, ки хушбахтона аз ҷониби аъзои коммисия бо баҳои баланд ҷонибдорӣ гардиданд.

Дар ҳамоиши мазкур мо барои аз толорҳои варзишӣ ва мавзеъҳои лижаронӣ, ки барои омодагӣ ба аввалин бозиҳои бачаҳои Осиё, ки соли 2019 дар шаҳри Сахалин баргузор мегардад, имкони дидан пайдо намудем. Дар муқоиса ба дидаҳои худ метавонам гӯям, ки имрӯз дар Тоҷикистони азизи мо низ тамоми шароитҳо барои ривоҷу равнақ додани ин намуди варзиш муҳайё гардидааст. Боиси сарфарозист, ки имрӯз дар Тоҷикистон намудҳои варзиши зимистона, лижаронии кӯҳӣ рушд ёфта, аз ин намуди варзиш иштирокчиёни бозиҳои олимпӣ ва осиёгӣ дорем ва ҳамзамон маҷмааи лижаронии Сафеддара махсусан барои ривоҷу равнақ додани варзиши намудҳои зимистона ҷавобгӯ ба тамоми меъёрҳои ҷаҳонист. Танҳо лозим аст, ки ҷавонони мо ба варзиш рӯ оварда, баҳри баланд бардоштани Парчами давлатамон дар арсаи ҷаҳонӣ заҳмату талоши бештар варзанд. Зеро муаррифии Ватан ва номбардори миллату давлати хеш шудан талоши ҳар чи бештар мехоҳад.

Шукрона ҲАКИМОВА, мутахассиси шуъбаи варзиш ва омодагӣ ба бозиҳои олимпии КМОТ