Дар толори Кохи фарҳанги Донишгоҳи давлатии Қӯрғонтеппа ба номи Носири Хусрав чорабинӣ дар мавзӯи “Роҳҳои пешгирии ҷавонон аз гаравиш ба ҳизбу ҳаракатҳои экстремистию террористӣ ва огоҳсозии онҳо аз хатарҳои ин зуҳурот” баргузор гардид.

Дар чорабинӣ сардори Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон полковник Шомиддин Шарифов, сардори шуъбаи муқовимат бо экстремизм, терроризм ва назорати иҷрои қонунҳо дар самти амнияти миллии прокуратураи вилояти Хатлон, мушовири дараҷаи 1, полковники адлия Саидқадам Зоирзода, ректори ДДҚ ба номи Носири Хусрав Шодиён Муҳаммад Султонзода, муовини сархатиби вилоят Усмоналӣ Норов, донишҷӯён ва фаъолони вилояти Хатлон иштирок доштанд.

Мақсади ин ҳамоиш ба ҳушёрию зиракии сиёсӣ даъват намудани ҷавонон, таблиғи арзишҳои миллию давлатдорӣ, дар рӯҳияи ватандӯстӣ тарбият намудани онҳо, ташвиқи ҷавонон ба илму донишомӯзӣ ва шарҳу тафсири пайомадҳои ногувори гаравиш ба ҳизбу созмонҳои ифротӣ арзёбӣ гардид.

Шодиён Муҳаммад, таъкид намуд, ки "Терроризму экстремизм имрӯз ба амнияти тамоми ҷаҳон хатарзо аст. Ифротгароии динӣ, ақида ва мавқеъгириҳои тунде, ки дар баъзе ҷавонҳои роҳгумзада мебинем, нишонаи мағзшӯӣ шудани онҳо аз ҷониби ҳизбу ҳаракатҳои хатарнок ва манъшуда мебошад".

- Терроризм ва экстремизм зуҳуроте мебошанд, ки ба амнияти тамоми сайёра имрӯзҳо таҳдид карда, ба раванди асосии рушди муносибатҳои байналмилалӣ ва иқтисоди кишварҳои ҷаҳон хатар эҷод менамоянд, - зикр намуд, Шомиддин Шарифов.

Умед МИРЗОЕВ, "ҶТ"