- Саҳми кормандони мақомоти корҳои дохилӣ дар пешгирии ҳуқуқвайронкунӣ ва қонуншиканӣ, тарбия ва ба роҳи дуруст ҳидоят намудани наврасону ҷавонон назаррас буда, чунин иқдом аз сиёсати дурандешона ва хирадмандонаи Роҳбари давлат маншаъ мегирад,- афзуд Абдусаломзода Анзурат.

Бо чунин сатрҳои ҳидоятомез дар ноҳияи Шаҳритус чанде пеш бо ҷавонону наврасон ва фаъолони ҷамоатҳои ноҳия вохӯрӣ доир гардид.

Дар он Абдусаломзода Анзурат, муовини раиси ноҳия, Азиз Азимов, муовини сардори Раёсати ҷавонон, варзиш ва сайёҳи вилояти Хатлон, ташкилоту муассисаҳо, имомхатибон ва сокинони ҷамоату деҳоти дурдасти ноҳия иштирок доштанд.

Азиз Азимов қайд кард: "Таҷрибаҳо нишон медиҳад, ки солҳои охир ба дастовардҳои сиёсиву иқтисодӣ ва инкишофи устувори ҷомеа танҳо ҳамон давлатҳое пирӯз гардидаанд, ки ба ҷавонон таваҷҷуҳи хосса зоҳир менамоянд".

Ин иқдоми пешгирифтаи Раёсати ҷавонон, варзиш ва сайёҳии вилояти Хатлон баҳри пешгирии ҷавонон аз шомилшавӣ ба гурӯҳҳои ифротгароӣ, ҷинояткорӣ, нашъамандӣ ва даст задан ба хариду фурӯши маводҳои мухаддир миёни ҷавонон буда, ҳамзамон дар мавриди Қонуни Ҷумҳурии Тоҷикистон "Дар бораи масъулияти падару модар дар таълиму тарбияи фарзанд" суҳбатҳо анҷом дода шуд.

Тибқи иттилои Раёсати ҷавонон, варзиш ва сайёҳии вилояти Хатлон чунин вохӯриҳо дар вилоят бо мақомотҳои дахлдор дар ташкилоту муассисаҳо, масҷидҳо ва ҷамоату деҳотҳои дурдасти вилоят баргузор гашта истодаанд.

Умед Мирзоев, “ҶТ”