Бо ташаббуси Бахши ҷавонон, варзиш ва сайёҳии ноҳияи Носири Хусрав 25 апрел дар Ҷамоати деҳоти "Истиқлол"-и ноҳия мулоқоти намояндагони вазорату идораҳои гуногун бо ҷавонон баргузор гардид.

Ба гуфтаи мудири Бахши ҷавонони ноҳияи мазкур Давлатшоҳ Амиров мақсади мулоқоти имрӯза, пешгирии ҷавонон аз шомилшавӣ ба ҳизбу равияҳои ифротӣ мебошад.

Дар ҷараёни мулоқот аз тарафи намояндагони мақомоти дахлдори ҳокимияти давлатии вилоят баҳри баланд бардоштани ҳуввияти миллии ҷавонон, татбиқи талаботи қонунҳои Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», «Дар бораи масъулияти падару модар дар таълиму тарбияи фарзанд» фаҳмонида шуд.

Дар чорабинӣ гурӯҳи таблиғотӣ оид ба коҳиши се ниҳод- оила, мактаб ва ҷомеа дар тарбия ибрози андеша намуда, барои ноил гардидан ба ҳадафи асосӣ мардумро ба фаъолият ва ҳамбастагии ин ниҳодҳо ҳидоят намуда, таъкид карда шуд, ки ноҳияи Носири Хусрав сарҳадӣ буда таъсири омилҳои берунӣ метавонад дар тарбияи фарзандон таъсири худро расонад.

Дар охир аз тарафи иштирокдорони вохӯрӣ як қатор таклифу пешниҳодҳо дар мавриди ҷалби ҷавонон ба кор, корҳои огоҳсозӣ дар миёни ҷавонони деҳот баргузор шуд.

Умед Мирзоев, "ҶТ"