21 ноябр дар толори маҷлисгоҳи Кумита раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо иштирокчиёни лагери омӯзишии “Пайравони Пешвои миллатем” мулоқот намуданд.

Лагери омӯзишии “Пайравони Пешвои миллатем” таҳти сарпарасии Президенти Федератсияи футболи Тоҷикистон, муҳтарам Рустами Эмомалӣ аз 21 – 24 ноябри соли 2018 дар ноҳияи Ҷ.Расулови вилояти Суғд, дар урдугоҳи “20 солагии Истиқлолияти давлатии Ҷумҳурии Тоҷикистон” бо иштироки зиёда аз 50 нафар ҷавонони фаъол аз шаҳру ноҳияҳои кишвар доир карда мешавад.

 Дар лагери омӯзишӣ ташкили машғулиятҳои варзишӣ ҷиҳати ташакули тарзи ҳаёти солим, тренингҳои омӯзишӣ дар мавзӯи «Нақш ва иштироки наврасону ҷавонон дар тарғиби ғоя ва арзишҳои миллӣ», “Малакаҳои роҳбарӣ ва хусусиятҳои он”, «Пешгирии ҷавонон аз ВНМО/БПНМ»,  «Малакаҳои муошират ва ровигӣ», «Шабакаҳои иҷтимоӣ ва роҳҳои дуруст истифода бурдани онҳо» баргузории “Шоми ҷавонӣ” дар назар дошта шудааст.

 Бо талошҳои пайгиронаи Пешвои маҳбуби кишвар, муҳтарам Эмомалӣ Раҳмон барои таҳсил ва зиндагии шоиста дар Ҷумҳурии Тоҷикистон тамоми шароитҳо фароҳам оварда шудааст. Мову Шуморо зарур аст, ки дар партави сиёсати хирадмандона ва созандаи Роҳбари давлат дониш омӯзем, илмҳои замони муосирро аз худ кунем, техника ва технологияи навниро аз бар намуда, ҳамчун мутахассисони баландихтисос дар пешрафти ватани азизамон саҳмгузор бошем – зикр намуд зимни мулоқот раиси Кумитаи кор бо ҷавонон ва варзиш Абдуллозода Аҳтам Рустам.