Дирӯз, 5 январ, раиси Кумитаи ҷавонон, варзиш ва сайёҳӣ Аҳтам Абдуллозода бо Сафири Фавқулода ва Мухтори Ҷопон дар Тоҷикистон ҷаноби Хаҷиме Китаока мулоқот кард.

Аҳтам Абдуллозода сафирро барои ташрифашон ба Кумитаи ҷавонон, варзиш ва сайёҳӣ хайрамақдам гуфта, аз ҳамкории дӯстонаи дипломатии ду кишвар ёдовар шуд. Зикр гардид, ки Ҷумҳурии Ҷопон яке аз аввалин кишварест, ки Истиқлолияти давлатии Ҷумҳурии Тоҷикистонро пазируфтааст.

Дар рафти мулоқот ҷонибҳо вобаста ба ҳамкориҳо дар самти тарбияи ҷисмонӣ, варзиш ва кор бо ҷавонон мубодилаи афкор намуданд.

Аҳтам Абдуллозода қайд намуд, ки иқтидори васеи кумита барои ҳамкориҳои манфиатбахшу эҳсосшаванда дар заминаи 132 мактаби варзишӣ мавҷуд мебошад, ки дар онҳо шумораи зиёди наврасону ҷавонон ҳамарӯза ройгон тамрин, аз ҷумла ба намуди дзюдо машғул мебошанд, ки ба ин васила аз фарҳанг ва таърихи мардуми Ҷопон огоҳӣ пайдо менамоянд.

Инчунин, бо дарназардошти Соли ҷавонон эълон гардидани соли 2017 раиси кумита пешниҳод намуд, ки дар чорабиниҳои фарҳагие, ки давоми сол баргузор мешаванд, ҷавонони кишвари Ҷопон иштирок намоянд. Зеро ба ин васила дӯстию рафоқати ҷавонони ду кишвар устувор гардида, аз ҳаёт ва фарҳанги якдигар шинос мегарданд.

Хаҷиме Китаока аз пазироии самимонаи масъулини Кумитаи ҷавонон, варзиш ва сайёҳӣ изҳори миннатдорӣ намуда, омодагии хешро барои ҳамкорӣ иброз дошт. Қайд намуд, ки дзюдо фарҳанги миллии Ҷопон ба ҳисоб меравад ва он ба намуди гуштини миллии тоҷикӣ наздикӣ дорад. Ҳамин аст, ки имрӯз наврасону ҷавонони зиёди тоҷик ба дзюдо рӯй овардаанд.

Илова бар ин, ҷаноби сафир аз раиси кумита хоҳиш намуд, ки барои мақсадноку ҳадафмандона ба роҳ мондани ҳамкориҳо хуб мебуд, то аз наздик бо фаъолияти мактабҳои варзишӣ ва марказҳои ҷавонон шинос гардад.