Баррасии мушкилии ҷавонон ва пешниҳоди роҳҳои ҳалли он дар замони муосир яке аз масъалаҳои асосӣ ба ҳисоб меравад. Дар ин замина гузаронида конфронсу мизҳои мудаввар бо иштироки мутахассисон ва намояндагони вазорату идораҳо ва ташкилоту ҷамъиятҳои бо ҷавонон сари кор дошта зарур ва ҳатмист.

Ба ҳамин мақсад имрӯз, 10 ноябр, бо ташаббуси ҶДММ Коллеҷи тиббӣ–иҷтимоии шаҳри Душанбе дар толори Маркази матбуотии ҷумҳуриявии АМИТ “Ховар” дар мавзӯи “Нақш ва мақоми ҷавонон дар ҷомеаи имрӯза” мизи мудаввар доир гардид.

Дар баргузории чорабинии мазкур намояндаҳо аз Вазорати маориф ва илми ҷумҳурӣ, Раёсати кор бо ҷавонон ва варзиши шаҳри Душанбе ва тамоми коллеҷҳои тиббии кишвар ҳузур доштанд.

Ҷамолиддин Амиров, намоянда аз Вазорати маориф ва илм иқдоми мазкурро дастгирӣ намуда, гузаронида чунин чорабиниҳоро саривақтӣ хонд. Ӯ гуфт: “Дар кишваре, ки аксарияти аҳолиашро ҷавонон ташкил медиҳанд ва дар тамоми корҳои сисёсию ҷамъиятӣ ба онҳо такя мекунанд, гузаронидани чунин мизҳои мудаввар аз манфиат холӣ нест. Маҳз муҳимии ин масъала аст, ки Пешвои миллат, муҳтарам Эмомалӣ Раҳмон соли равонро “Соли ҷавонон” эълон намуданд”.

Дар рафти мизи мудаввар намояндаҳо аз коллеҷҳои ҷумҳурӣ дар мавзӯҳои “Раванди татбиқи сиёсати давлатии ҷавонон дар Тоҷикистони соҳибистиқлол”, “Пешгирии экстемизм ва терроризм миёни ҷавонон”, “Иҷлосияи тақдирсоз ва нақши он дар таҳкими Ваҳдати миллӣ”, “Тарбияи ватанпарастии ҷавонон”, “Соли ҷавонон” эълон шудани соли 2017 аз нигоҳи ҷавонон”, “Роҳҳои баланд бардоштани сифати дониши ҷавонон дар низоми таълим”, “Раванди татбиқи сиёсати давлатии ҷавонон дар Тоҷикистони соҳибистиқлол”, “Ҷавонон ва терроризми байналмилалӣ: роҳу воситаҳои пешгирии ҷавонон аз шомилшавӣ ба ҳизбу ҳаркатҳои иртиҷоӣ” ва “Аз ҷавонии хеш бояд фахр кард”, ки ҳамагӣ ба ҳаёти ҷавонон рабт доштанд, маърӯза намуда пешниҳоду дархостҳои худро доир ба мушкилиҳои ҷойдошта матраҳ намуданд.